జగన్ ఆరునెలల పాలనపై రోజా ఆసక్తికర వ్యాఖ్యలు
- IndiaGlitz, [Tuesday,November 26 2019]
ఆంధ్రప్రదేశ్ ఎన్నికల్లో కనివినీ ఎరుగని రీతిలో సీట్లు సంపాదించుకున్న వైసీపీ అధినేత వైఎస్ జగన్ మోహన్‌రెడ్డి ప్రభుత్వాన్ని ఏర్పాటు చేశారు. కాగా.. ఆయన సీఎంగా ప్రమాణం చేయక మునుపునుంచే అనేక సంచలనాలకు తెరతీశారు. కీలక నిర్ణయాలు, అధికారుల మార్పులు, పలు సంచలన చట్టాలు, జీవోలు జారీ చేయడం ఇలాంటి అనేక కార్యక్రమాలను వైఎస్ జగన్ చేపట్టారు. అంతేకాదు.. కేబినెట్ కూర్పే ఒక సంచలన నిర్ణయమని చెప్పుకోవచ్చు. అయితే సీఎంగా వైఎస్ జగన్ మోహన్ రెడ్డి త్వరలోనే ఆరు నెలల పాలన పూర్తి చేసుకోబోతున్నారు. ఈ సందర్భంగా వైసీపీ చెందిన మంత్రులు, ఎమ్మెల్యేలు, నేతలు మీడియా ముఖంగా జగన్‌ను ఆకాశానికెత్తేస్తున్నారు. మరోవైపు వైసీపీ శ్రేణులు సోషల్ మీడియా వేదికగా పెద్ద ఎత్తున హడావుడే చేస్తున్నారు.
‘సై.. సైరా నరసింహారెడ్డి’..!
తాజాగా.. నగరి ఎమ్మెల్యే, ఏపీఐఐసీ చైర్‌పర్సన్ రోజా శెల్వమణి.. జగన్ పరిపాలనపై ఆసక్తికర వ్యాఖ్యలు చేశారు. అంతేకాదండోయ్.. జగన్ పాలనను టాలీవుడ్ మెగాస్టార్ చిరంజీవి సినిమాతో పోల్చారు. జగన్ మోహన్ రెడ్డి ఆరు నెలల పాలన చూసి ప్రజలు ‘సై.. సైరా నరసింహారెడ్డి’ అంటున్నారని ఆమె వ్యాఖ్యానించారు. ఈ సందర్భంగా టీడీపీ అధినేత, ప్రతిపక్షనేత చంద్రబాబు, జనసేనాధిపతి పవన్ కళ్యాణ్‌పై తీవ్ర విమర్శలు గుప్పించారు. బాబు, పవన్‌లకు చిన్నమెదడు చితికిపోయిందని ఆమె తీవ్ర విమర్శలు గుప్పించారు. ఆ ఇద్దరికీ అలా అయినందువల్లే.. ఇసుక, ఇంగ్లీష్ మీడియం విషయంలో వివాదాలు సృష్టించారని రోజా మండిపడ్డారు. మత మార్పిడులు చేస్తున్నారని చంద్రబాబు తప్పుడు ప్రచారం చేస్తున్నారని ఆమె ఆగ్రహం వ్యక్తం చేశారు. చంద్రబాబు బాధ తెలుగు కోసం కాదు.. ప్రజల కోసం కాదని.. బినామీల స్కూళ్లు మూతపడతాయని భయమని రోజా వ్యాఖ్యానించారు. వైఎస్ జగన్ సీఎంగా మరో 20, 30 సంవత్సరాలు కొనసాగాలని ఆంధ్రప్రదేశ్ ప్రజలు కోరుకుంటున్నారని రోజా చెప్పుకొచ్చారు. కాగా చాలా రోజుల తర్వాత మీడియా ముందుకొచ్చిన రోజా ఆసక్తికర వ్యాఖ్యలు చేశారు. మరి విమర్శలపై చంద్రబాబు, పవన్ కల్యాణ్ ఎలా రియాక్ట్ అవుతారో వేచి చూడాల్సిందే మరి.