ஆஸ்திரேலியாவுக்கு சுற்றுப்பயணம் செய்துள்ள இந்திய அணி கடந்த 6ஆம் தேதி தொடங்கிய முதல் டெஸ்ட் போட்டியில் 31 ரன்கள் வித்தியாசத்தில் த்ரில் வெற்றி பெற்றது. இந்த போட்டியில் புஜாரே மற்றும் அஸ்வின் அபாரமாக விளையாடி அணிக்கு வெற்றியை தேடி தந்தனர்.

இந்த நிலையில் நாளை தொடங்கவுள்ள 2வது டெஸ்ட் போட்டிக்கான இந்திய அணி அறிவிக்கப்பட்டுள்ளது. இதில் முதல் டெஸ்ட்டில் நன்றாக பந்துவீசிய அஸ்வின் பெயர் இடம்பெறவில்லை. அதேபோல் முன்னணி பேட்ஸ்மேன்களில் ஒருவரான ரோஹித்தும் இல்லை. இருவரும் காயம் அடைந்திருப்பதால் அணியில் இடம்பெறவில்லை என அறிவிக்கப்பட்டுள்ளது.

ரோஹித் சர்மாவுக்கு பதிலாக இந்திய அணியில் ஹனுமா விஹாரி இடம்பெற்றுள்ளார். இருப்பினும் இவர் 11 பேர் அணியில் இருப்பாரா? என்பதை பொறுத்திருந்துதான் பார்க்க வேண்டும். அதேபோல் அஸ்வினுக்கு பதிலாக ஜடேஜா களமிறங்குகிறார். முரளிவிஜய், கே.எல்.ராகுல் இருவரும் கடந்த டெஸ்ட் போட்டியில் ஜொலிக்கவில்லை என்றாலும் 2வது டெஸ்ட்டில் இடம்பெற்றுள்ளனர் என்பது குறிப்பிடத்தக்கது.

இந்த நிலையில் இந்திய அணியில் விராட் கோலி (கேப்டன்), முரளி விஜய், ராகுல், புஜாரா, ரஹானே (துணை கேப்டன்), ஹனுமா விஹாரி, ரிஷப் பண்ட், ஜடேஜா, இஷாந்த் சர்மா, ஷமி, பும்ரா, புவனேஸ்வர் குமார், உமேஷ் யாதவ் ஆகியோர் இடம்பெற்றுள்ளனர். இதில் விளையாடும் 11 பேர் கொண்ட அணி போட்டி தொடங்குவதற்கு சில நிமிடங்களுக்கு முன் அறிவிக்கப்படும்