విశాఖలో ఘోర రోడ్డు ప్రమాదం జరిగింది. రైల్వే స్టేషన్‌ నుంచి సిరిపురం వైపు విద్యార్థులతో వెళ్తున్న ఆటో అదుపుతప్పి లారీని ఢీకొట్టింది. దీంతో ఆటో మూడు పల్టీలు కొట్టడంతో ఆటోలో ఉన్న ఏడుగురు విద్యార్థులు తీవ్రంగా గాయపడ్డారు. వీరిలో ఇద్దరి పరిస్థితి విషమంగా ఉంది. ఈ ప్రమాదంలో ఆటో నుజ్జు నుజ్జు అయిపోయింది. వెంటనే స్పందించిన స్థానికులు ఆటోను లేపి పిల్లలకు సపర్యలు చేశారు. రహదారిపై రక్తపు మడుగులో పడి ఉన్న విద్యార్థులను సమీపంలోని ఓ ప్రైవేటు ఆసుపత్రికి తరలించారు.

అయితే ఆటో డ్రైవర్‌ నిర్లక్ష్యం వల్లే ప్రమాదం చోటుచేసుకుందని సీసీ కెమెరా దృశ్యాలను పరిశీలించిన అనంతరం పోలీసులు వెల్లడించారు. ఈ ఘటనలో ఆటోడ్రైవర్ కూడా గాయపడ్డాడని.. లారీ డ్రైవర్, క్లీనర్‌ని కూడా అదుపులోకి తీసుకున్నామని తెలిపారు. ఈ దృశ్యాలు చూస్తుంటే చాలా హృదయవిదారకంగా ఉన్నాయి. పిల్లలు బోరున ఏడుస్తూ రక్తం కారుతున్న గాయాలతో రోడ్డుపై పడి ఉండటం అందరినీ చలింపచేస్తుంది. ప్రమాదం విషయం తెలుసుకున్న విద్యార్థుల తల్లిదండ్రులు కన్నీరుమున్నీరుగా విలపించారు. ఈ దృశ్యాలు అందరినీ కలిచివేశాయి.

కాగా మరో ఘటనలో మధురవాడ-నగరం పాలెం రోడ్డులో ఆటో బోల్తా పడి విద్యార్థులకు గాయాలయ్యాయి. ప్రమాద సమయంలో ఆటోలో ఎనిమిది మంది విద్యార్థులు ఉండగా.. వారందరూ స్వల్పంగా గాయపడ్డారు. నగరంలో వరుస ప్రమాదాల్లో విద్యార్థులు గాయపడటంతో తల్లిదండ్రులు కన్నీటి పర్యంతమవుతున్నారు.