எங்களை மேலும் நொந்து போக வைக்காதீர்கள். ஆட்சியாளர்களுக்கு ஆர்.ஜே.பாலாஜி வேண்டுகோள்
- IndiaGlitz, [Monday,November 06 2017]
நெல்லையில் கந்துவட்டி கொடுமையால் ஒரு குடும்பமே தீக்குளித்த சம்பவத்தை அடிப்படையாக வைத்து பிரபல கார்ட்டூனிஸ்ட் பாலா அவர்கள் கார்ட்டூன் ஒன்றை வரைந்திருந்தார். இதற்காக அவர் நேற்று கைது செய்யப்பட்டு இன்று ஜாமீனில் வெளிவந்துள்ளார்.
இந்த கைது சம்பவத்திற்கு எதிர்க்கட்சி தலைவர்களும் சமூக ஆர்வலர்களும் கண்டனம் தெரிவித்து வரும் நிலையில் ஆர்.ஜே.பாலாஜி தனது சமூக வலைத்தளத்தில் இதுகுறித்து தனது கருத்தை தெரிவித்துள்ளார்.
ஆர்.ஜே.பாலாஜி கூறியதாவது, 'கார்ட்டூனிஸ்டுகள், சமூகப் போராளிகளைக் கைது செய்வது, மாறுபட்ட கருத்து கொண்ட மக்கள் மீது அடக்குமுறையைக் கையாள்வது போன்றவை பயம் கொள்ள வைக்கின்றன. ஏற்கெனவே இந்த அரசியலால் சோர்ந்து போய் இருக்கிறோம். எங்களை மேலும் நொந்து போக வைக்காதீர்கள். திருநெல்வேலியில் நடந்தது வெட்ககரமானது, சோகமயமானது. கார்ட்டூனிஸ்ட் செய்தது தவறென்று நிரூபிக்க வேண்டுமென்றால், அந்தப் பிரச்சினையின் மீது கவனம் செலுத்தி, மீண்டும் அப்படி ஒன்று நிகழாமல் இருக்க வழி செய்யுங்கள்' என்று கூறியுள்ளார்.