தற்போது ஒரு படம் சூப்பர் ஹிட் ஆகவேண்டும் என்றால் அந்த படத்திற்கு அரசியல்வாதிகள் எதிர்ப்பு தெரிவிக்க வேண்டும் என்ற நிலை ஏற்பட்டுள்ளது. சாதாரண வெற்றிப்படங்களான 'மெர்சல்' மற்றும் 'சர்கார்' படங்களை ஒருசில அரசியல்வாதிகள் சூப்பர்ஹிட் படங்களாக மாற்றியுள்ளதே இதற்கு ஒரு எடுத்துக்காட்டாக உள்ளது.

இந்த நிலையில் விஜய் படத்திற்கு மட்டுமே எதிர்ப்பு தெரிவித்த அரசியல்வாதிகள் எங்கள் படத்திற்கு ஓரவஞ்சனை பார்ப்பது ஏன்? என்று சமீபத்தில் 'தமிழ்ப்படம் 2' இயக்குனர் சி.எஸ்.அமுதன் தனது குமுறலை வெளிப்படுத்தியிருந்தார்

இந்த நிலையில் தற்போது முதல்முறையாக 'எல்.கே.ஜி' என்ற படத்தில் ஹீரோவாக நடித்து வரும் காமெடி நடிகர் ஆர்.ஜே.பாலாஜியும் இதேபோன்ற ஒரு வேண்டுகோளை தனது சமூக வலைத்தளத்தில் வைத்துள்ளார். அவர் அதில் கூறியிருப்பதாவது: மதிப்பிற்குரிய அரசியல்வாதிகளே! பெரிய படத்துக்கு மட்டும் இல்லாம, கொஞ்சம் சின்ன படத்துக்கும் ஹெல்ப் பண்ணுங்க...ப்ளீஸ்' என்று பதிவு செய்துள்ளார்.

'சர்கார்' படத்தில் அரசியல்வாதி கேரக்டரில் பழ.கருப்பையா நடித்தது போலவே இந்த படத்திலும் நாஞ்சில் சம்பத் முக்கிய கேரக்டரில் நடித்துள்ளார் என்பதும் சர்கார்' படம் போலவே இந்த படமும் அரசியல் குறித்த கதையம்சம் கொண்டது என்பதும் குறிப்பிடத்தக்கது.