காமெடி நடிகரான ஆர்ஜே பாலாஜி முக்கிய வேடத்தில் நடித்துள்ள 'எல்.கே.ஜி. திரைப்படம் விரைவில் வெளிவரவுள்ள நிலையில் இந்த படத்தின் டிரைலர் சற்றுமுன் வெளியாகியுள்ளது. ஏற்கனவே ஹிட்டாகியுள்ள 'எத்தனை காலம் தாம் ஏமாற்றுவாய் இந்த நாட்டிலே' என்ற பாட்டின் பின்னணியில் வெளியாகியுள்ள இந்த டிரைலரில் ரூ.3000 கோடி செலவில் சிலை, தெர்மாகூல் விவகாரம், மனுஷனை விட மாட்டுக்கு அதிக பாதுகாப்பு, என மாநில, தேசிய அரசியல் என ஒன்றையும் விட்டுவைக்காமல் கலாய்க்கப்பட்டுள்ளது.

தலைவர் இறந்தவுடன் அழுவது போல் சீன் போடுவது, திடீரென வரும் நடிகருக்கு குவியும் கூட்டம், 100 நாள் ஷோ செய்துவிட்டு சிஎம் ஆக ஆசைப்படுவது போன்ற காட்சிகள் பல நிஜ நிகழ்வுகளை ஞாபகப்படுத்துகிறது.

வந்தேறி, பச்சைத்தமிழன் மற்றும் தமிழரான அஸ்வின் விக்கெட் எடுத்தால் இந்திய வீரர் என்று சொல்வதும் ராமேஸ்வரம் மீனவர்கள் சுடப்பட்டால் தமிழக மீனவர்கள் என்று சொல்வதும் ஏன்? போன்ற வசனங்கள் சிரிக்கவும் சிந்திக்கவும் வைக்கின்றன.

மொத்தத்தில் இந்த படத்தை எந்த அரசியல்வாதியாவது பிரச்சனை செய்து இலவச விளம்பரம் செய்தால் சூப்பர் ஹிட்டாக வாய்ப்பு உள்ளது. இதுவரை பெரிய நடிகர்களின் படங்களுடன் மட்டுமே மோதிவந்த அரசியல்வாதிகள் ஆர்ஜே பாலாஜியுடன் மோதுவார்களா? என்பதை பொறுத்திருந்து பார்ப்போம்