வயிற்றிலும் கழுத்திலும் குத்த வேண்டும்.. 'பஞ்ச்' பேசி டீச்சராக மாறிய 'வேட்டையன்' நடிகை..!
- IndiaGlitz, [Monday,October 28 2024]
சூப்பர் ஸ்டார் ரஜினிகாந்த் நடித்த ‘வேட்டையன்’ திரைப்படத்தில் காவல்துறை அதிகாரியாக நடித்த நடிகை ரித்திகா சிங், பஞ்ச் டயலாக் பேசி பெண்களுக்கான பாதுகாப்பு கலை குறித்த டீச்சராக மாறிய நிலையில், அது பற்றிய வீடியோ அவரது இன்ஸ்டாவில் வைரல் ஆகி வருகிறது.
நடிகை ரித்திகா சிங் அடிப்படையில் ஒரு குத்துச்சண்டை வீராங்கனை என்பதால், 'இறுதிச்சுற்று’ திரைப்படத்தில் குத்துச்சண்டை வீராங்கனை கேரக்டர்களில் நடித்தார் என்பதும், அந்த படம் மிகப்பெரிய வெற்றி பெற்றது என்பதும் தெரிந்ததே. அதன் பின்னர், அவரது ஸ்டண்ட் கலைக்கு ஏற்ற கேரக்டர்கள் கிடைக்கவில்லை என்ற நிலையில், ‘வேட்டையன்’ படத்தில் காவல்துறை அதிகாரியாக நடித்தார் என்பதும், ஸ்டண்ட் காட்சியில் அசத்தலான நடிப்பை காட்டியுள்ளார் என்பதும் தெரிகிறது.
இந்த நிலையில், சமீபத்தில் தனது இன்ஸ்டாகிராம் பக்கத்தில் பெண்களுக்கான பாதுகாப்பு பற்றிய தகவலை வீடியோவைப் பகிர்ந்துள்ளார். இதில், யாராவது தாக்க வரும்போது முதலில் அவர்களின் தாக்குதலை தடுத்து, வயிற்றிலும் கழுத்திலும் மாறி மாறி குத்த வேண்டும் என்றும், அதன் பிறகு வலது புற கழுத்தில் குத்தினால் நம்மை தாக்கும் எதிரி அவ்வளவு தான்’ என்றும் கூறியுள்ளார். ’வேட்டையன் ஹூக்’ என்று பெயர் வைத்துள்ள இந்த பஞ்ச் பற்றிய வீடியோ தற்போது இணையத்தில் வைரலாகி வருகிறது.
‘வேட்டையன்’ திரைப்படத்தில் ரூபா கரன் என்ற கதாபாத்திரத்தில் நடித்த #CleanShotChallenge என்ற ஹேஷ்டேக்கில் இந்த வீடியோவை பெண்களுக்கு பாதுகாப்பு அம்சமாக பதிவு செய்துள்ளார்.