వివాదాస్ప‌ద ద‌ర్శ‌కుడు రామ్‌గోపాల్ వ‌ర్మ వ‌రుస సినిమాల‌ను అనౌన్స్ చేస్తూ.. వాటిని పూర్తి చేస్తూ సెన్సేష‌న్ క్రియేట్ చేస్తున్నాడు. బ‌యోపిక్స్‌ను తెర‌కెక్కించ‌డంలో దిట్ట అయిన ఆర్జీవీ చాలా రోజుల ముందే దివంగ‌త త‌మిళ‌నాడు ముఖ్య‌మంత్రి జ‌య‌ల‌లిత స్నేహితురాలు శ‌శిక‌ళ బ‌యోపిక్‌ను తెర‌కెక్కిస్తాన‌ని ప్ర‌క‌టించిన సంగ‌తి తెలిసిందే. ఇప్పుడు మ‌రోసారి వ‌ర్మ శ‌శిక‌ళ బ‌యోపిక్‌కు సంబంధించి అప్‌డేట్‌ను ప్ర‌క‌టించాడు. ‘‘‘శశికళ’ సినిమాను తెరకెక్కిస్తున్నాం. ఎస్ అనే మ‌హిళ‌, ఇ అనే పురుషుడు ఓ నాయ‌కురాలి జీవితంలో ఎలాంటి పాత్ర‌ను పోషించారో మా సినిమాలో చూపించ‌బోతున్నాం. త‌మిళ‌నాడు ఎన్నిక‌ల ముందు, స‌ద‌రు నాయ‌కురాలి బ‌యోపిక్ విడుద‌ల‌కు ముందే మా సినిమా విడుద‌ల‌వుతుంది. చాలా స‌న్నిహితంగా ఉన్న‌ప్పుడే చంప‌డానికి సుల‌భం అవుతుంది అని పాత త‌మిళ సామెత ఉంది’’ అన్నారు.

ఈ క్ర‌మంలో చూస్తే త‌లైవి చిత్రాన్ని వ‌చ్చే ఏడాది ఫిబ్ర‌వ‌రి 24న విడుద‌ల చేయ‌డానికి నిర్మాత‌లు స‌న్నాహాలు చేస్తున్న‌ట్లే.. అదే రోజున ఆర్జీవీ శ‌శిక‌ళ సినిమా విడుద‌ల‌వుతుంది. ఆర్జీవీ త‌న సినిమాలో పాత్ర‌లు నిజ జీవితంలోని వ్య‌క్తుల‌ను పోలి ఉంటాయి. మ‌రి ఈ చిత్రంలో శ‌శిక‌ళ పాత్ర‌ధారిగా, జ‌య‌ల‌లిత‌గాఎవ‌రెవ‌రు న‌టిస్తారు? అనేది కూడా ఆస‌క్తిని రేపుతుంది.