ఆర్జీవీ మరో సంచలన సినిమా ప్రకటన...
- IndiaGlitz, [Sunday,March 31 2019]
వివాదాలకు మారుపేరు.. వివాదాలు పుట్టిందే మా ఇంట్లోనే అన్నట్లుగా వ్యవహరించే వ్యక్తి.. దర్శకుడు రామ్‌గోపాల్ వర్మ. అందుకే అందరు డైరెక్టర్స్‌ మాదిరిగా కాకుండా డిఫరెంట్‌ సినిమాలతో సూపర్ డూపర్ హిట్స్‌ అన్నీ తన ఖాతాలో వేసుకుంటుంటారు ఆర్జీవీ. ఇప్పటికే ఎన్నో వివాదాలు.. మరెన్నో కోర్టు పంచాయితీల మధ్య ఆర్జీవీ సినిమాలు విడుదల చేసిన సంగతి తెలిసిందే. అయితే ఆ సినిమాలన్నీ యదార్థ ఘటనలే కావడం విశేషమనే చెప్పుకోవచ్చు.
ఇదిలా ఉంటే.. ఇప్పటికే ఆయన తెరకెక్కించిన ‘లక్ష్మీస్ ఎన్టీఆర్’ మూవీ సూపర్ హిట్ టాక్ అందుకోవడంతో చిత్రబృందం విజయోత్సవాలకు సిద్ధమవుతోంది. ఈ తరుణంలో అభిమానులు, సినీ ప్రియులు, ముఖ్యంగా తమిళులకు ఆదివారం పూట తియ్యటి శుభవార్త చెప్పారు వర్మ. గతంలోనే తాను దివంగత ముఖ్యమంత్రి జయలలిత నెచ్చలి అయిన శశికళపై సినిమా తీస్తానని ఆర్జీవీ ప్రకటించారు. అయితే ఇవన్నీ ఒట్టి మాటలేనని అందరూ అనుకున్నారు. అయితే తాజాగా.. ఈ సినిమాకు సంబంధించి చిన్న అప్డేట్ కూడా ఇచ్చారాయన.
ట్విట్టర్ వేదిక పోస్టర్ విడుదల..
త్వరలో తాను తెరకెక్కించబోయే ‘శశికళ’ సినిమాకు సంబంధించి పోస్టర్‌‌ను విడుదల చేశారు. శశికళ, జయలలిత పక్కపక్కనే కూర్చున్న ఫొటోతో.. లవ్ ఈజ్ డేంజరస్లీ పొలిటికల్’ అనేది ఈ టైటిల్‌కు ఉపశీర్షికగా పెట్టారు. ఈ కథ దయలేని మనుషులుకు, మన్నార్‌గుడి గ్యాంగ్స్‌కు, జైలు గోడలకు మధ్య ఉన్న సంబంధాల చుట్టూ తిరుగుతుందని ఆర్జీవీ సంచలన ట్వీట్ చేశాడు. ఈ సినిమాకు సంబంధించి త్వరలోనే అన్ని వివరాలు వెల్లడిస్తానన్నారు. ఈ ట్వీట్‌కు ఆయన అభిమానులు, సినీ ప్రియులు పెద్ద ఎత్తున కామెంట్ల వర్షం కురిపిస్తున్నారు.
కాగా.. జయలలిత ప్రాణ స్నేహితురాలిగా అందరూ చెప్పుకునే ‘శశికళ’ గురించి మున్ముంథు ఆర్జీవీ సెన్సేషనే చేయబోతున్నారన్న మాట. ఈ టైటిల్‌లో ‘శశి’ అనే రెండక్షరాలు రక్తపు రంగులో ఉండగా.. ‘కళ’ అనే అక్షరాలు నలుపురంగులో ఉన్నాయి. అంటే శశిని ఏ రేంజ్‌‌లో చూపించబోతున్నారో దీన్ని బట్టి అర్థం చేస్కోవచ్చు. మున్ముంథు ఆర్జీవీ ఎన్నెన్ని సంచలనాలకు దారితీస్తారో వేచి చూడాల్సిందే మరి.