'ரெமோ' தயாரிப்பாளரின் புத்திசாலித்தனமான ஐடியா
- IndiaGlitz, [Tuesday,August 23 2016]
தமிழ் திரையுலகினர்களுக்கு சவால் கொடுக்கும் ஒரே விஷயம் திருட்டு டிவிடி என்னும் அரக்கர்கள்தான். என்னதான் சட்டங்கள் போட்டு விழிப்புடன் இருந்தாலும், ரிலீஸ் ஆன முதல் நாளே திருட்டி டிவிடிக்கள் பஜார்களில் சர்வ சாதாரணமாக கிடைக்கின்றது. அதிலும் முன்னணி நடிகர்களின் படங்கள் என்றால் சொல்லவே வேண்டாம். முதல் காட்சி முடிந்தவுடனே திருட்டு டிவிடிக்கள் கிடைக்கின்றது.
இந்நிலையில் இந்த திருட்டு டிவிடிக்களுக்கு மிக முக்கிய காரணம் வெளிநாடுகளில் முந்தைய நாள் இரவே படத்தை ரிலீஸ் செய்வதுதான் என்று கூறப்படுகிறது. முந்தைய நாள் காட்சியிலேயே பதிவு செய்து திருட்டு டிவிடிக்களை உருவாக்கி வருவதால்தான் தமிழகத்தில் முதல் நாளே திருட்டு டிவிடிக்கள் கிடைக்கின்றது.
இதனால் 'ரெமோ' தயாரிப்பாளர் ஒரு புத்திசாலித்தனமான ஐடியாவை கடைபிடிக்கவுள்ளார். இந்த படம் வெளிநாடுகளில் முந்தைய நாட்களில் பிரிவியூ காட்சி உள்பட எந்த காட்சியும் கிடையாது என்றும் தமிழகத்தில் ரிலீஸ் ஆன மறுநாள்தான் வெளிநாடுகளில் ரிலீஸ் ஆகவுள்ளதாகவும் கூறப்படுகிறது. இந்த ஐடியா ஒர்க் அவுட் ஆனால் மற்ற தயாரிப்பாளர்களும் இதை கடைபிடிக்கலாம்.