అప్పుడు రీమేక్.. ఇప్పుడు రీమిక్స్
- IndiaGlitz, [Sunday,April 15 2018]
యువ కథానాయకుడు నాగ చైతన్య కథానాయకుడిగా, చందు మొండేటి దర్శకత్వంలో రూపుదిద్దుకుంటున్న సినిమా ‘సవ్యసాచి’. మైత్రీ మూవీ మేకర్స్ నిర్మిస్తున్న ఈ సినిమాలో నిధి అగర్వాల్ కథానాయికగా నటిస్తోంది. స్వ‌ర‌వాణి కీరవాణి స్వరాలను అందిస్తున్నారు. ఇదిలా ఉంటే.. ఈ చిత్రం కోసం గ‌తంలో నాగార్జున హీరోగా వచ్చిన ‘అల్లరి అల్లుడు’ (1993) సినిమాలోని “నిన్ను రోడ్డు మీద చూసినది లగాయత్తు” అనే పాటను రీమిక్స్ చేస్తున్న సంగతి తెలిసిందే. అప్పట్లో ఆ పాటలో నాగ్ సరసన రమ్యకృష్ణ వెండితెరపై సందడి చేయగా.. ఇప్పుడు ఈ రీమిక్స్ సాంగ్‌లో చైతుతో కలిసి రకుల్ ప్రీత్ సింగ్ ఆడిపాడనుందని సమాచారం.
ఇంత‌కుముందు చైతు హీరోగా చందు మొండేటి దర్శకత్వంలో ‘ప్రేమమ్’ సినిమా వచ్చిన సంగతి తెలిసిందే. మలయాళం మూవీ ‘ప్రేమమ్’కి రీమేక్‌గా ఈ సినిమాని తెరకెక్కించారు దర్శకుడు. చైతుతో కలిసి చందు మొండేటి చేసిన తొలి సినిమా రీమేక్ చిత్రమైతే.. మలి చిత్రంలో పాటను రీమిక్స్ చేస్తుండ‌డం విశేషం. మరి గత రీమేక్ చిత్రంలాగే.. ఈ రీమిక్స్ ఉన్న చిత్రం కూడా ఆకట్టుకుంటుందేమో చూడాలి.