రాబోయేది జనసేన ప్రభుత్వమే గుర్తుపెట్టుకోండి!
- IndiaGlitz, [Tuesday,April 09 2019]
ఆంధ్రప్రదేశ్‌లో రాబోయేది జనసేన ప్రభుత్వమేనని అంతా గుర్తుపెట్టుకోండని పార్టీ అధినేత పవన్ కల్యాణ్ జోస్యం చెప్పారు. పాలకొల్లులో నిర్వహించిన ఎన్నికల ప్రచారంలో పవన్ మాట్లాడుతూ.. రానుంది జనసేన ప్రభుత్వం.. వైసీపీ-టీడీపీ ప్రభుత్వం కాదు. కాలం మార్పు కోరుకుంటోంది. దాన్ని ఎవ‌రూ క‌నిపెట్టలేరు. ఫ‌లితం వ‌చ్చాకే అది తెలుస్తుంది. 2014 ఎన్నిక‌ల‌కు ముందు వైసీపీకి స్వీపింగ్ విక్టరీ ఖాయం అన్నారు. ఏం జ‌రిగింది.
పోనీ ఓట‌మి పాఠం నేర్పిందా అంటే అదీ లేదు. గ‌డ‌చిన ఐదేళ్లలో జ‌గ‌న్మోహ‌న్‌రెడ్డి రాష్ట్రానికి ఏం చేశారు. బుగ్గలు నిమురుతూ, గ‌డ్డాలు ప‌ట్టుకుంటూ తిరిగితే ముఖ్యమంత్రి అవ్వరు. ప్రజ‌ల‌కు మ‌ర్యాద ఇస్తే మాత్రమే అవుతారు. ఇంట్లో హ‌త్య జ‌రిగిన‌పుడు పోలీస్ వెరిఫికేష‌న్ చేయించి నిందితుల్ని ప‌ట్టుకుంటే, శాంతిభ‌ద్రత‌ల‌ను బ‌లంగా పాటిస్తే ముఖ్యమంత్రి అవుతారు. తిరుమ‌ల ఏడుకొండ‌ల వాడికి చెప్పులు విడిచి మోక‌రిల్లితే అవుతారు. ఎవ‌రి ఇష్టారాజ్యం వారు చేయ‌డానికి ఇదేం పులివెందుల ఇడుపుల‌పాయ కాదు అని పవన్ ఆగ్రహంతో ఊగిపోయారు.
కేసీఆర్.. కొత్త పార్టీ పెట్టొచ్చుగా!
జ‌గ‌న్‌కి మ‌ద్దతు ఇస్తానంటున్న కేసీఆర్ యాద‌గిరిగుట్టకు చెప్పుల‌తో వ‌స్తానంటే ఒప్పుకుంటారా? మీ దృష్టిలో తెలంగాణ న‌ర‌సింహ‌స్వామి, ఆంధ్రా వెంక‌టేశ్వర స్వామి వేరా..? దైవం మీద గౌరవం లేని అలాంటి వ్యక్తుల‌కు మ‌ద్దతు ఇస్తే ఎలా..? తెలంగాణ‌లో ఆంధ్రులు రాజ‌కీయాలు చేయ‌రాదు. ఆంధ్రలో మాత్రం మీరు రాజ‌కీయాలు చేయొచ్చు. చంద్రబాబు నుంచి ఆంధ్రాప్రజ‌ల్ను కాపాడాలి అనుకుంటే, చంద్రబాబు విమోచ‌న స‌మితి అని వేరే పార్టీ స్థాపించి, అభ్యర్ధుల్ని నిల‌బెట్టి గెలిచి రాష్ట్రాన్ని ర‌క్షించండి అని కేసీఆర్‌కు పవన్ సూచించారు.