ప్ర‌స్తుతం నాగార్జున బిగ్‌బాస్ 3కి వ్యాఖ్యాతగా వ్య‌వ‌హ‌రిస్తోన్న సంగ‌తి తెలిసిందే. ఈ వారం బిగ్‌బాస్‌లో హోస్ట్‌లో నాగార్జున‌కు సంబంధించిన ఆస‌క్తిక‌ర‌మైన విష‌యం తెలిసింది. అదేంటంటే ఆయ‌న చేతిపై మ‌రో కొత్త టాటూ వేయించుకున్నారు. ఇప్ప‌టికే జ‌బ్బ‌పై, ఎడ‌మ చేతి మ‌ణిక‌ట్టు ద‌గ్గ‌ర టాటూ వేయించుకున్న నాగ్‌..ఈసారి మ‌ణిక‌ట్టు నుండి మోచేయి వ‌ర‌కు కొత్త టాటూని వేయించుకున్నారు. మొన్న 60వ బ‌ర్త్ డే సెల‌బ్రేష‌న్స్ కోసం ఫ్యామిలీతో క‌లిసి స్పెయిన్ వెళ్లిన‌ప్పుడు అక్క‌డ కొత్త టాటూ వేయించుకున్నారు.

ఇంత‌కు ఆ టాటూ ఏంటో తెలుసా? దిక్చూచి, నాగుపాముల క‌ల‌యితో ఉన్న ఈ టాటూలో నాగుపామును చూస్తే అర్థమ‌వుతుంది. ఇక దిక్చూచిలో క‌న్ను ఉంది. ఎన్ అనే అక్ష‌రం కూడా ఉంది. సాధార‌ణంగా దిక్చూచిలో ఎన్ అనే అక్ష‌రానికి అర్థం ఉత్త‌ర దిక్కు అని లేదా నాగార్జున అని పేరుని కూడా సూచించ‌వ‌చ్చున‌ని చెప్పాడు నాగ్‌. ఇక దిక్చూచిలో క‌న్నుకు అర్థం తాను ఎప్పుడూ కొత్త విష‌యాల‌ను అన్వేషిస్తుంటాన‌నే విష‌యాన్ని తెలియ‌జేస్తుంద‌ని అన్నారు. ఇక పాము ప‌క్క‌న ఉండే చుక్క‌లకు అర్థం పాము కుబుసాన్ని విడిచి కొత్త చ‌ర్మాన్ని పొందుతుంది. అలాగే తాను కూడా గ‌తం గ‌తః అనే తీరుతో పాత విష‌యాల‌ను మ‌రచిపోయి ముందుకు సాగుతాన‌ని చెప్పుకొచ్చాడు నాగ్‌.

అలీ రెజా ఔట్‌

బిగ్‌బాస్ 3లో ఈవారం ఎలిమినేష‌న్‌లో రాహుల్‌, అలీ, ర‌వి, శ్రీముఖి, మ‌హేశ్‌లు నామినేట్ అయ్యారు. ఆరు వారాల ఎలిమినేష‌న్‌లో ఇప్ప‌టి వ‌ర‌కు నామినేట్ కానీ అలీ రెజా తొలిసారి నామినేట్ అయ్యారు. అదే స‌మ‌యంలో ఎలిమినేట్ కూడా అయ్యారు. అలీ రెజా ఎలిమినేట్ అవుతాడంటూ సోష‌ల్ మీడియాలో వ‌చ్చిన వార్త‌లు మ‌రోసారి నిజ‌మ‌య్యాయి. అలీ రెజా ఎలిమినేష‌న్‌తో అంద‌రూ బాధ‌ప‌డ్డారు. ముఖ్యంగా శ్రీముఖి, జ్యోతి క‌న్నీరు పెట్టుకున్నారు.