మహారాజా రవితేజ వరుసగా ప్రాజెక్ట్‌లను పట్టాలెక్కిస్తున్న సంగతి తెలిసిందే. తాజాగా ఆయన హీరోగా రూపొందుతున్న యాక్షన్ థ్రిల్లర్ “రామారావు ఆన్ డ్యూటీ”. ప్రస్తుతం ఈ సినిమా షూటింగ్ పూర్తి కావొచ్చింది. శరత్ మండవ దర్శకత్వం వహిస్తున్న ఈ మూవీలో రవితేజ సరసన దివ్యాంశ కౌశిక్, రజిషా విజయన్ కథానాయికలుగా నటిస్తున్నారు. సీనియర్ హీరో వేణు తొట్టెంపూడి కీలక పాత్రలో కనిపించనున్నారు. ఎస్ఎల్వీ సినిమాస్ ఎల్ఎల్పి, ఆర్టీ టీమ్‌వర్క్స్ సంయుక్తంగా నిర్మిస్తున్న ఈ చిత్రానికి సామ్ సిఎస్ సంగీతం అందిస్తున్నారు.

“రామారావు ఆన్ డ్యూటీ” 2022 మార్చి 25న ప్రేక్షకుల ముందుకు రావాల్సింది. అయితే అదే రోజున ఎస్ఎస్ రాజమౌళి దర్శకత్వంలో ఎన్టీఆర్ -రామ్ చరణ్ కలిసి నటించిన ఆర్ఆర్ఆర్ రిలీజ్ వుండటంతో రామారావు కూడా విడుదలను ఆపుకున్నాడు. కాగా.. ఈ సినిమా టీజర్‌ను మార్చి 1న ప్రేక్షకుల ముందుకు తీసుకు వస్తున్నట్టు చిత్ర యూనిట్ శనివారం అనౌన్స్ చేసింది. బహుశా అదే రోజున రిలీజ్ డేట్ కూడా చెబుతారేమో చూడాలి.

దీనితో పాటు నక్కిన త్రినాథరావు దర్శకత్వంలో ‘‘ధమాకా’’ షూటింగ్‌లో పాల్గొంటున్నారు మాస్ మహారాజా. ఈ సినిమాలో ఆయన ద్విపాత్రాభినయం చేస్తున్నారని సమాచారం. ఖిలాడీ మాదిరిగానే ఈ సినిమాలోనూ ఇద్దరు హీరోయిన్లు వున్నారు. పీపుల్స్ మీడియా ఫ్యాక్టరీ, అభిషేక్ అగర్వాల్ ఆర్ట్స్ సంయుక్తంగా నిర్మిస్తోన్న ఈ చిత్రానికి నిర్మాతగా టీజీ విశ్వ ప్రసాద్, సహ నిర్మాతగా వివేక్ కూచిబొట్ల వ్యవహరిస్తున్నారు. అలాగే వంశీ తెరకెక్కిస్తున్న ‘‘టైగర్ నాగేశ్వ‌ర‌రావు’’. యంగ్ డైరెక్టర్ సుధీర్ వర్మ దర్శకత్వంలో ‘‘రావణాసుర’’ అనే సినిమాలకు గ్రీన్ సిగ్నల్ ఇచ్చాడు మాస్ మహారాజ్.