మాస్ మ‌హారాజా ర‌వితేజ ఇప్పుడు కొత్త సినిమాల‌కు ఓకే చెబుతున్నాడు. లేటెస్ట్ స‌మాచారం మేర‌కు ద‌ర్శ‌కుడు త్రినాథ‌రావు న‌క్కిన డైరెక్ష‌న్‌లో ర‌వితేజ సినిమా చేయబోతున్నాడ‌ని వార్త‌లు విన‌ప‌డుతున్నాయి. వివ‌రాల మేర‌కు ‘హ‌లో గురు ప్రేమ కోస‌మే’ సినిమా త‌ర్వాత త్రినాథ రావు న‌క్కిన వెంక‌టేశ్‌తో సినిమా చేయాల్సింది. కానీ చివ‌రి నిమిషంలో ప్రాజెక్ట్ ప‌ట్టాలెక్క‌లేదు. త‌ర్వాత త్రినాథ‌రావు వేచి చూడ‌క త‌ప్ప‌లేదు. లేటెస్ట్ స‌మాచారం ప్ర‌కారం త్రినాథ‌రావు ద‌ర్శ‌క‌త్వంలో ర‌వితేజ హీరోగా ఓ సినిమా రూపొందే అవ‌కాశాలున్నాయ‌ట‌. ఇప్ప‌టికే ర‌వితేజ‌ను త్రినాథ‌రావు క‌లిసి స్క్రిప్ట్ ప‌రంగా డిస్క‌ష‌న్స్ చేశాడట‌. త్వ‌ర‌లోనే వీరి ప్రాజెక్ట్ ఫైన‌ల్ అవుతుందంటున్నారు. పీపుల్ మీడియా ఫ్యాక్ట‌రీ బ్యాన‌ర్‌పై సినిమా రూపొందుతుందంటున్నారు.

ర‌వితేజ‌కు ఈ మ‌ధ్య స‌క్సెస్‌లే లేవు. రీసెంట్‌గా విడుద‌లైన ‘డిస్కోరాజా’ బాక్సాఫీస్ ద‌గ్గ‌ర బోల్తా కొట్టిన సంగ‌తి తెలిసిందే. అయితే ఇవేం ప‌ట్టించుకోని ర‌వితేజ ‘క్రాక్’ సినిమాను ట్రాక్ ఎక్కించేశాడు. ఈ సినిమా మే 8న విడుదలవుతుంది. ఇది పూర్త‌వ‌గానే ర‌మేశ్‌వ‌ర్మ ద‌ర్శ‌క‌త్వంలో ఓ సినిమా చేస్తాడు. ఈ చిత్రానికి ‘కిలాడి’ అనే పేరు ప‌రిశీల‌న‌లో ఉంది. ర‌మేశ్ వ‌ర్మ సినిమాతో పాటు త్రినాథ‌రావు సినిమాలోనూ ర‌వితేజ న‌టించే అవ‌కాశాలు ఎక్కువ‌గా ఉన్నాయంటున్నారు.