వరుస పరాజయాలతో ఉన్న మాస్ మ‌హారాజ్‌ రవితేజ రాజా ది గ్రేట్`తో మళ్ళీ ట్రాక్‌లోకి వ‌చ్చారు. ఈ సినిమా ఇచ్చిన విజయంతో రవితేజ తన స్పీడ్ పెంచారు. ప్రస్తుతం రవితేజ, విక్రమ్ సిరికొండ రూపొందిస్తున్న టచ్ చేసి చూడు` సినిమా షూటింగులో ఉన్నారు. ఈ సినిమాని సంక్రాంతి కానుకగా థియేటర్లలోకి తీసుకురానున్నారు.

ఆ సినిమా త‌రువాత‌.. డైరెక్టర్స్ శ్రీను వైట్ల, కళ్యాణ్ కృష్ణలతో రెండు సినిమాలను చేస్తున్న‌ట్లు టాలీవుడ్ వ‌ర్గాలు పేర్కొంటున్నాయి. తాజా స‌మాచారం ప్ర‌కారం.. కళ్యాణ్ కృష్ణతో చేస్తున్న సినిమా ఈ నెల నుంచి షూటింగ్ కూడా ప్రారంభించుకోనుంద‌ని తెలిసింది. సోగ్గాడే చిన్ని నాయనా`, రారండోయ్ వేడుక చూద్దాం` వంటి కుటుంబ కథా చిత్రాల్ని తీసిన కళ్యాణ్ కృష్ణ.. రవితేజ కోసం రొమాంటిక్ ఫ్యామిలీ డ్రామాను రెడీ చేసార‌ట‌.

ఈ సినిమాని చుట్టాలబ్బాయి` నిర్మాత రామ్ తాళ్లూరి నిర్మిస్తున్నారు. ఈ సినిమాకి సంబంధించిన పూర్తి వివ‌రాలు త్వ‌ర‌లోనే వెల్ల‌డి కానున్నాయి.