హిట్టు ఫ్లాప్‌తో సంబంధం లేకుండా వరుసపెట్టి సినిమాలు చేస్తున్నారు మాస్ మహారాజా రవితేజ. ఈ ఏడాది ఇప్పటికే వాల్తేర్ వీరయ్యతో విజయాన్ని తన ఖాతాలో వేసుకున్నారు. ఆ వెంటనే రావణాసురను రిలీజ్ చేశాడు. కానీ ఈ సినిమాకు ఆశించిన స్థాయిలో ఆదరణ దక్కలేదు. హిట్టు ఫ్లాప్‌లను ఏమాత్రం పట్టించుకోని రవితేజ తాను నమ్ముకున్న మార్గంలో సినిమాలు చేసుకుంటూ వెళ్లిపోతారు. తాజాగా ఆయన నటిస్తోన్న చిత్రం ‘‘టైగర్ నాగేశ్వరరావు’’. ఈ సినిమాను వంశీ తెర‌కెక్కిస్తున్నారు. అలాగే ఈ సినిమాలో రేణు దేశాయ్ ఒక కీల‌క పాత్ర‌లో న‌టిస్తున్నారు.

ఇప్పటికే రిలీజైన పోస్టర్స్ , ప్రీ లుక్‌లకు మంచి స్పందన రావడంతో పాటు ఈ సినిమాపై ఇండస్ట్రీలో భారీ అంచనాలున్నాయి. తాజాగా ఈ రోజు టైగర్ నాగేశ్వరరావు టీజర్‌ను రిలీజ్ చేశారు మేకర్స్. “హైదరాబాద్, బొంబాయి, ఢిల్లీ సహా దేశంలోని అనేక నగరాల్లో దోపిడీలు చేసిన స్టువర్టుపురం దొంగ దుర్భేధ్యమైన మద్రాసు సెంట్రల్ జైలు నుంచి తప్పించుకున్నాడు” అనే వార్త వాయిస్ ఓవర్‌తో టీజర్ మొదలైంది. అతడి కోసం దేశవ్యాప్తంగా పలు రాష్ట్రాలకు చెందిన పోలీసులు తీవ్రంగా గాలిస్తుంటారు. ఈ క్రమంలో నాగేశ్వరరావును పట్టుకునే బాధ్యతను మురళీ శర్మకు అనుపమే ఖేర్ అప్పగిస్తారు.

8 ఏళ్లకే రక్తం తాగాడంటూ పవర్‌ఫుల్ డైలాగ్:

ఈ దశలో నాగేశ్వరరావులోని బెస్ట్ క్వాలిటీస్‌ను మురళీ శర్మ చెబుతూ వుంటారు. అతను రాజకీయాల్లోకి వెళ్లి ఉంటే.. తన తెలివితేటలతో ఎలక్షన్ గెలిచేవాడు. స్పోర్ట్స్ లోకి వెళ్లి ఉంటే పరుగుతో ఇండియాకు మెడల్ తెచ్చి ఉండేవాడు. ఆర్మీలోకి వెళ్లి ఉంటే తన ధైర్యంతో ఓ యుద్ధమే గెలిచి ఉండేవాడు. దురదృష్టకరంగా వాడు ఓ క్రిమినల్ అయ్యాడు అంటూ మురళీశర్మ చెప్పిన డైలాగ్ బాగుంది. ఆ వెంటనే సినిమాలోని యాక్షన్ సీక్వెన్స్, దొంగతనాలు చేసే విధానాన్ని కూడా రివీల్ చేశారు. “పులి, సింహం కూడా ఓ వయసు వచ్చేదాక పాలే తాగుతాయి సర్. కానీ వీడు 8 ఏళ్లకే రక్తం తాగడం మొదలుపెట్టాడు” అని చెప్పడం ద్వారా రవితేజ క్యార్టెక్టర్ ఎంత పవర్‌ఫుల్‍గా ఉండనుందో అర్థమవుతోంది.

టీజర్‌కే హైలెట్‌గా నిలిచిన ట్రైన్ దోపిడీ సీన్ :

వంతెనపై యమస్పీడుగా వెళుతున్న ట్రైన్‍కు కొక్కెం వేసి దాంట్లోకి ప్రవేశించే సీన్ టోటల్ టీజర్‌కే హైలెట్ గా నిలిచింది. జీవీ ప్రకాశ్ కుమార్ బ్యాక్ గ్రౌండ్ మ్యూజిక్ కూడా చాలా బాగుంది. మొత్తంగా ఈ టీజర్‌తో టైగర్ నాగేశ్వరరావుపై అంచనాలను మరింత పెంచేశారని చెప్పవచ్చు. ఈ ఏడాది అక్టోబర్ 20న ఈ చిత్రం తెలుగు, తమిళ, కన్నడ, మలయాళ, హిందీ భాషల్లో విడుదల కానుంది. టైగర్ నాగేశ్వరరావులో రవితేజ సరసన గాయత్రి భరద్వాజ్, నూపూర్ సనన్ హీరోయిన్లుగా నటిస్తున్నారు. అనుపమ్ ఖేర్, రేణూ దేశాయ్, జిషు సేన్ గుప్తాలు కీలకపాత్రలు పోషిస్తున్నారు. అభిషేక్ పిక్చర్ నిర్మిస్తోన్న ఈ సినిమాను దసరా కానుకగా పాన్ ఇండియా స్థాయిలో ఐదు భాషల్లో రిలీజ్ చేయనున్నారు.