మాస్ మ‌హారాజా రవితేజ సినిమా అంటేనే కావలసినంత వినోదం. మంచి కామెడీ టైమింగ్‌తో పాటు తన మార్క్‌ యాస డైలాగులతో తెరపై సందడి చేస్తారాయ‌న‌. ఇక ఈ మాస్ మహారాజా సినిమాలో ఫైట్లు కూడా తన డైలాగుల్లాగే మాస్ గానే ఉంటాయి. ఇదిలా ఉంటే.. ప్రస్తుతం రవితేజ యువ ద‌ర్శ‌కుడు కళ్యాణ్ కృష్ణ డైరెక్ష‌న్‌లో 'నేల టికెట్' సినిమా చేస్తున్న‌ విషయం తెలిసిందే.

కుటుంబకథా చిత్రంగా తెరకెక్కుతున్న ఈ చిత్రానికి రవితేజ శైలిని జోడించి కథను సిద్ధం చేసుకున్నారు దర్శకుడు. అలాగే.. రవితేజ ఎనర్జీకి ఏ మాత్రం తగ్గకుండా ఈ సినిమాలో ఫైట్స్‌ను కూడా డిజైన్ చేసుకున్నార‌ని స‌మాచారం.

అందులో భాగంగానే.. ప్రస్తుతం రామోజీ ఫిల్మ్ సిటీలో ఫైట్ మాస్టర్స్ రామ్, లక్ష్మణ్ డిజైన్ చేసిన భారీ పోరాట సన్నివేశాలను చిత్రీకరిస్తున్నార‌ని తెలిసింది. ఈ సన్నివేశాలే సినిమాలో ప్రత్యేక ఆకర్షణగా నిలుస్తాయ‌ని చిత్ర స‌న్నిహిత వర్గాలు పేర్కొంటున్నాయి. మాళవిక శర్మ కథానాయికగా పరిచయం అవుతున్న ఈ సినిమా వేసవి కానుకగా విడుదల కానుంది.