రవితేజ, మాళవిక శర్మ జంట‌గా నటిస్తున్న చిత్రం 'నేల టికెట్' (ప్రచారంలో ఉన్న పేరు). కళ్యాణ్ కృష్ణ దర్శకుడు. తన గత చిత్రాల మాదిరిగానే.. అన్ని వ‌ర్గాల‌ ప్రేక్షకులను ఆకట్టుకునే విధంగా ఈ సినిమాను తెరకెక్కిస్తున్నారు ద‌ర్శ‌కుడు. అలాగే రవితేజ శైలికి తగ్గట్టుగానూ ఈ చిత్రాన్ని రూపొందిస్తున్నట్టు చిత్ర వర్గాలు పేర్కొంటున్నాయి.

ప్రస్తుతం రామోజీ ఫిలింసిటీలో ఈ చిత్రానికే ప్రత్యేక ఆకర్షణగా నిలిచే కొన్ని పోరాట సన్నివేశాలను చిత్రీకరిస్తున్నారు ఫైట్ మాస్టర్స్ రామ్, లక్ష్మణ్. ఇప్పటికే సగానికి పైగా చిత్రీకరణ పూర్తి చేసుకున్న ఈ చిత్రంపై రవితేజ అభిమానుల్లో భారీ అంచనాలే ఉన్నాయి.

ఈ నేపథ్యంలో రవితేజ ఫ్యాన్స్‌ను ఆనందపరిచేందుకు.. ఈ సినిమా ఫస్ట్ లుక్‌ను ఉగాది సందర్భంగా ఈ నెల 18న విడుదల చేయనున్నట్టు చిత్ర వర్గాలు పేర్కొంటున్నాయి. ఇందులో జగపతిబాబు ఓ పవర్‌ఫుల్‌ రాజకీయనాయకుడిగా కనిపించనున్నార‌ని స‌మాచారం.

శక్తి కాంత్ కార్తీక్‌ సంగీతాన్ని అందిస్తున్న ఈ కుటుంబకథా చిత్రాన్ని రామ్ తాళ్లూరి నిర్మిస్తున్నారు. వేసవి కానుకగా ఈ సినిమా ప్రేక్షకుల ముందుకు రానుంది.