பிரபல தெலுங்கு நடிகர் ரவி தேஜா நடிப்பில் உருவான ’டைகர் நாகேஸ்வரராவ்’ என்ற திரைப்படம் தமிழ், தெலுங்கு, மலையாளம், ஹிந்தி மற்றும் கன்னடம் என ஐந்து மொழிகளில் உருவாகி உள்ளது. இந்த படம் அக்டோபர் 20ஆம் தேதி வெளியாக இருக்கும் நிலையில் இந்த படத்தின் டீசரை இந்த படத்தின் இசையமைப்பாளர் ஜிவி பிரகாஷ் தன்னுடைய சமூக வலைதள பக்கத்தில் வெளியிட்டுள்ளார். இந்த டீசர் வீடியோ தற்போது இணையத்தில் வைரலாகி வருகிறது.

டீசரின் முதல் காட்சியிலேயே நாகேஸ்வரராவ் என்ற கொடூரமான கிரிமினல் சிறையில் இருந்து தப்பித்து சென்று விட்டதாக அறிவிக்கப்படும். இதுவரைக்கும் இந்த ஜெயிலில் இருந்து ஒருத்தர் கூட தப்பித்து போனதில்லை என்று ஜெயிலர் கூறிய நிலையில் நாகேஸ்வரராவ் மட்டும் தப்பித்து போனது எப்படி என்பதுதான் போலீசாருக்கு பெரும் அதிர்ச்சியாக இருக்கும்.

நாகேஸ்வரராவ் ஒரு அரசியல்வாதியாக இருந்திருந்தால் மிகப்பெரிய தலைவராக இருப்பார், விளையாட்டுத் துறையில் இருந்தால் மிகப்பெரிய விளையாட்டு வீரராக இருப்பார், ராணுவத்தில் இருந்திருந்தால் ஒரே ஆளாக ஒரு போரையே நடத்திருப்பார், ஆனால் அவர் துரதிஷ்டவசமாக அவர் ஒரு கிரிமினல் ஆகிவிட்டார், அவரை பிடிப்பது மிகவும் சிரமம் என்று டெல்லி போலீசார் பேசுவது போன்ற காட்சி ஒன்று இந்த டீசரில் உள்ளதை அடுத்து நாகேஸ்வரராவ் என்ற ரவிதேஜாவின் கேரக்டர் மிகப்பெரிய அளவில் பில்டப் செய்யப்பட்டிருக்கும்.

அதிரடி ஆக்சன் காட்சிகள் அடங்கிய இந்த படத்தில் ரவிதேஜா, நுபுர் சனான், காயத்ரி பரத்வாஜ் உள்ளிட்ட பலர் நடித்துள்ளனர். வம்சி இயக்கத்தில் ஜிவி பிரகாஷ் இசையில் மதி ஒளிப்பதிவில் இந்த படம் உருவாகியுள்ளது. இந்த படம் ரவிதேஜாவின் முதல் பான் - இந்திய திரைப்படம் என்பது குறிப்பிடத்தக்கது.