క‌థానాయ‌కుడు రవితేజ, ద‌ర్శ‌కుడు కళ్యాణ్ కృష్ణ కాంబినేషన్‌లో తెరకెక్కుతున్న సినిమా ‘నేల టికెట్టు’. హిమాలయ త‌దిత‌ర‌ వాణిజ్య ప్రకటనల్లో నటించిన మోడల్  మాళవిక శర్మ.. ఈ చిత్రంతో కథానాయికగా పరిచయం కానుంది. వేసవి కానుకగా విడుదల కానున్న ఈ సినిమా ప్ర‌స్తుతం శరవేగంగా చిత్రీకరణను జరుపుకుంటోంది. ఇదిలా ఉంటే.. ఈ సినిమా మాళవిక కెరీర్ గ్రాఫ్‌ను అమాంతం పెంచేసింది.

ఈమె నటించిన తొలి సినిమా ఇంకా విడుదలైనా కాకముందే.. వరుస ఆఫర్లు క్యూ కడుతున్నాయి. తెలుగు పరిశ్రమలో కొంతమంది దర్శక నిర్మాతలు మాళవిక డేట్స్ కోసం ఎదురుచూస్తున్న తరుణంలో.. ద‌ర్శ‌కుడు  ప్రవీణ్ సత్తారు తన తదుపరి చిత్రంలో మాళవికను ఎంపిక చేసినట్టు సమాచారం. రామ్ హీరోగా ప్రవీణ్ దర్శకత్వంలో ఓ సినిమా రూపుదిద్దుకోబోతున్న సంగతి తెలిసిందే. ఈ సినిమా కోసమే మాళవికను నాయికగా ఎంపిక చేశారని తెలుస్తోంది. రామ్‌, ప్ర‌వీణ్ చిత్రం కోసం ఇంత‌కుముందు కాజ‌ల్ పేరు వినిపించింది. తాజా స‌మాచారం ప్ర‌కారం.. ఇప్పుడా ఆ అవ‌కాశం మాళ‌విక‌ని వ‌రించింద‌ని తెలిసింది. త్వ‌ర‌లోనే మాళ‌విక ఎంట్రీపై క్లారిటీ వ‌స్తుంది.