ఏడాదికి కనీసం మూడు సినిమాలైనా విడుదలయ్యేట్టు ప్లాన్ చేసుకుంటున్నారు రవితేజ. ఇప్పటికే ఈ ఏడాదిలో ‘టచ్ చేసి చూడు’తో ప్రేక్షకుల ముందుకు రాగా.. కల్యాణ్ కృష్ణ దర్శకత్వంలో తెరకెక్కిన ఆయ‌న తాజా చిత్రం ‘నేల టిక్కెట్టు’ ఈ నెల 25న థియేటర్‌లలో సందడి చేయనుంది. అలాగే శ్రీనువైట్ల డైరెక్షన్‌లో రూపుదిద్దుకుంటున్న ‘అమర్ అక్బర్ ఆంటోనీ’ సినిమాను కూడా ఈ ఏడాది చివర్లో ప్రేక్షకుల ముందుకు తీసుకురావడానికి సన్నాహాలు జరుగుతున్నాయి.

ఈ నేపథ్యంలో ఈ సినిమాపై పూర్తిగా దృష్టి సారించనున్నారు మాస్ మహారాజా. కథానుసారం యు.ఎస్‌లో చిత్రీకరణను జరుపుకుంటున్న ఈ చిత్రం.. ఇప్పటికే కొంతవరకు షూటింగ్ పార్టును పూర్తి చేసుకుంది. ప్రస్తుతం రవితేజ కూడా ఫ్రీ అయిపోవడంతో.. రెండు నెలల పాటు యు.ఎస్‌లో జ‌రిగే ఈ సినిమా చిత్రీక‌ర‌ణ‌తో బిజీ కానున్నార‌ని సమాచారం. త‌మ‌న్ సంగీత‌మందిస్తున్న ఈ చిత్రంలో ఇలియానా, శ్రుతి హాస‌న్ హీరోయిన్లుగా న‌టించే అవ‌కాశ‌ముంది.