మాస్ మహారాజా రవితేజ కథానాయకుడిగా నటిస్తున్న చిత్రం ‘అమర్ అక్బర్ ఆంటోనీ’. శ్రీను వైట్ల దర్శకత్వం వహిస్తున్నారు. గతంలో వీరి కాంబినేషన్‌లో ‘నీకోసం’, ‘వెంకీ’, ‘దుబాయ్‌ శీను’ లాంటి విజయవంతమైన చిత్రాలు రావడంతో ఈ సినిమాపై కూడా భారీ అంచనాలే ఉన్నాయి. ఇదిలా ఉంటే.. ఈ సినిమాలో రవితేజ సరసన కేర‌ళ‌ కుట్టి అను ఇమ్మాన్యుయేల్ హీరోయిన్‌గా నటించాల్సి ఉండగా.. అనూహ్యంగా ఆమె స్థానంలో గోవా బ్యూటీ ఇలియానా వచ్చి చేరింది.

అయితే.. ఈ సినిమా నుంచి అను తప్పుకోవడం గురించి రవితేజ స్పందిస్తూ ఏమన్నారంటే.. “ఆ అమ్మాయి నటిస్తున్న ‘శైలజా రెడ్డి అల్లుడు’తో మా సినిమా షెడ్యూల్ క్లాష్ అయింది. మా సినిమా అమెరికాలో 50 రోజుల షెడ్యూల్.. అందులోనూ భారీ తారాగణం.. త‌న‌ కోసం షెడ్యూల్‌ను వాయిదా వేసే పరిస్థితి లేదు. అలాగే అను కూడా డేట్స్ అడ్జస్ట్ చేయలేకపోయింది. అందువలనే ఆమె తప్పుకుంద”ని చెప్పుకొచ్చారు రవితేజ. అంతేగాకుండా.. భవిష్యత్తులో అనుతో తప్పకుండా ఓ సినిమా చేస్తానని కూడా పేర్కొన్నారు మాస్ మహారాజా. ఇదిలా ఉంటే.. రవితేజ నటించిన తాజా చిత్రం ‘నేల టిక్కెట్టు’ ఈ నెల 25న విడుదల కానుంది.