ലോകത്താകമാനം ആരാധകരുള്ള വ്യവസായ പ്രമുഖൻ രത്തൻ ടാറ്റയ്ക്ക് ഇന്ന് (ഡിസംബര്‍ 28) 85-ാം പിറന്നാള്‍. ടാറ്റ സണ്‍സ് ചെയര്‍മാനായ രത്തന്‍ ടാറ്റ ലോകം മുഴുവൻ ആരാധിക്കുന്ന ബിസിനസ്സുകാരൻ ആയിട്ടും ലോകത്തെ ഏറ്റവും വലിയ സമ്പന്നരുടെ പട്ടികയില്‍ അദ്ദേഹം ഇതുവരെ എത്തിയിട്ടില്ലെന്നത് അതിശയകരമായ ഒരു വസ്തുതയാണ്.

2022ല്‍ ഐഐഎഫ്എല്‍ വെല്‍ത്ത് ഹ്യൂറന്‍ ഇന്ത്യ പുറത്തിറക്കിയ സമ്പന്നരുടെ പട്ടികയില്‍ രത്തന്‍ ടാറ്റ ഇടം നേടിയിട്ടുണ്ട്. എന്നാല്‍ സമ്പന്നന്‍ എന്ന നിലയിലല്ല. സോഷ്യല്‍ മീഡിയയില്‍ ഏറ്റവും കൂടുതല്‍ ഫോളോവേഴ്‌സ് ഉള്ള ബിസിനസ്സുകാരന്‍ എന്ന വിഭാഗത്തിലാണ് രത്തന്‍ ടാറ്റയുടെ പേരുള്ളത്. ട്വിറ്ററില്‍ 118 ലക്ഷം പേരാണ് അദ്ദേഹത്തെ ഫോളോ ചെയുന്നത്. 2022 ൽ മാത്രം 18 ലക്ഷം പേരാണ് അദ്ദേഹത്തെ ഫോളോ ചെയ്തത്.

രത്തന്‍ ടാറ്റയുടെ ആകെ ആസ്തി ഏകദേശം 3800 കോടിയാണ്. ഐഐഎഫ്എല്‍ ഹ്യൂറന്‍ ഇന്ത്യ 2022 പുറത്തിറക്കിയ പട്ടികയില്‍ ഏറ്റവും സമ്പന്നരായ ഇന്ത്യാക്കാരുടെ പട്ടികയില്‍ 421-ാം സ്ഥാനത്താണ് രത്തന്‍ ടാറ്റ. ടാറ്റ ഗ്രൂപ്പ് നേടുന്ന ലാഭത്തിൻ്റെ 66 ശതമാനത്തോളം ജീവകാരുണ്യ പ്രവര്‍ത്തനങ്ങള്‍ക്കായി ചെലവഴിക്കുന്നതാണ് സമ്പന്ന പട്ടികയില്‍ അദ്ദേഹത്തിൻ്റെ സ്ഥാനം പിന്നിലേക്ക് ആകാൻ കാരണമെന്ന് റിപ്പോർട്ടുകൾ സൂചിപ്പിക്കുന്നു.