Pushpa 2 :‘పుష్ప2‘ సెట్ ఫోటోను షేర్ చేసిన రష్మిక.. సోషల్ మీడియాలో వైరల్
- IndiaGlitz, [Friday,September 08 2023]
జాతీయ అవార్డ్ గ్రహీత, ఐకాన్ స్టార్ అల్లు అర్జున్ - సుకుమార్ కాంబినేషన్‌లో తెరకెక్కుతోన్న చిత్రం పుష్ప 2. శరవేగంగా ఈ సినిమా షూటింగ్‌ను నిర్వహిస్తోంది యూనిట్. పుష్ప ది రైజింగ్‌కు దేశవ్యాప్తంగా మంచి ఆదరణ లభించిన నేపథ్యంలో అన్ని జాగ్రత్తలు తీసుకుని మేకర్స్ పార్ట్ 2ని తెరకెక్కిస్తున్నారు. దీనికి తోడు రీసెంట్‌గా అల్లు అర్జున్ ఏకంగా జాతీయ ఉత్తమ నటుడు అవార్డ్‌ను కైవసం చేసుకోవడంతో పుష్ప 2పై భారీ అంచనాలున్నాయి.
పుష్ప 2 నుంచి అప్‌డేట్స్ వచ్చి చాలాకాలం అవుతోంది. దీంతో కొత్త అప్‌డేట్స్ కోసం ప్రేక్షకులు కళ్లు కాయలు కాచేలా ఎదురుచూస్తున్నారు. దీనికి చెక్ పెడుతూ హీరోయిన్ రష్మిక మందన్నా ఇన్‌స్టాగ్రామ్‌లో ఓ పోస్ట్ పెట్టారు. అందులో ఓ భారీ సెట్‌కు సంబంధించిన ఫోటో వుంది. ఇక్కడే రష్మిక, బన్నీల మధ్య కీలక సన్నివేశాలు చిత్రీకరిస్తున్నట్లుగా ఫిలింనగర్ టాక్. హైదరాబాద్ రామోజీ ఫిల్మ్ సిటీలో ఈ సెట్ వేసినట్లుగా తెలుస్తోంది.
ఇప్పటి వరకు 75 శాతం షూటింగ్ పూర్తి చేసుకోగా.. తాజా షెడ్యూల్‌ను కూడా త్వరగా కంప్లీట్ చేసి వీలైనంత త్వరగా సినిమాను ప్రేక్షకుల ముందుకు తీసుకురావాలని దర్శక నిర్మాతలు భావిస్తున్నారు. తొలుత ఈ ఏడాది చివరి నాటికి పుష్ప 2ను ప్రేక్షకుల ముందుకు తీసుకురావాలని భావించారు. అయితే ఈ సినిమాపై నెలకొన్న అంచనాల నేపథ్యంలో అన్ని జాగ్రత్తలు తీసుకుని వచ్చే ఏడాది రిలీజ్ చేయాలని మేకర్స్ భావిస్తున్నారు.
ఇటీవల ‘‘బేబీ’’ మూవీ సక్సెస్ మీట్‌లో పాల్గొన్న అల్లు అర్జున్.. తన స్పీచ్ ముగుస్తుందనగా ‘పుష్ప 2’లోని డైలాగ్ కావాలంటూ ఫ్యాన్స్ గోల చేయడంతో వారి కోరికను మన్నించి ఓ డైలాగ్ వదిలారు . ‘‘ ఈడంతా జరిగేది ఒకటే రూల్ మీద జరుగుతుండాది.. పుష్పాగాడి రూల్'' అంటూ బన్నీ చిత్తూరు యాసలో చెప్పిన డైలాగ్‌తో ఫ్యాన్స్ ఈలలు, కేకలు పెట్టారు. పుష్ప 2లో మలయాళ నటుడు ఫహాద్ ఫాజిల్ విలన్‌ పాత్ర పోషిస్తున్నారు. అనసూయ, సునీల్ , జగపతి బాబు, జగదీష్ ప్రతాప్ భండారి, ప్రకాష్ రాజ్, రావు రమేష్ , అజయ్ కీలక పాత్రలు పోషిస్తున్నారు.