రంగస్థలం..రెండు చిరు సినిమాలు
- IndiaGlitz, [Friday,December 15 2017]
పాత సినిమాల స్ఫూర్తితో కొత్త చిత్రాలు తెర‌కెక్క‌డం ప‌రిశ్ర‌మ‌లో చాలా సాధార‌ణ‌మైన అంశ‌మే. అలా కొత్త త‌ర‌హాలో వ‌చ్చిన ఆ పాత క‌థ‌లు మంచి విజ‌యాన్ని అందించిన సంద‌ర్భాలు అనేకం. ఇలాంటి జాబితాలో మ‌రో చిత్రం చేర‌నుంది. ఆ సినిమానే రంగస్థలం. మెగాప‌వ‌ర్ స్టార్ రామ్‌చ‌ర‌ణ్ క‌థానాయ‌కుడిగా న‌టిస్తున్న ఈ చిత్రానికి క్రియేటివ్ డైరెక్ట‌ర్ సుకుమార్ ద‌ర్శ‌క‌త్వం వ‌హిస్తున్నారు. అందాల న‌టి స‌మంత ఇందులో డీ గ్లామ‌ర్ లుక్‌లో సందడి చేయ‌నుంది.
ఇదిలా ఉంటే.. మెగాస్టార్ చిరంజీవి క‌థానాయ‌కుడిగా రూపొందిన రెండు పాత సినిమాల ఛాయ‌ల‌తో రంగస్థలం తెర‌కెక్కుతోంద‌ని క‌థనాలు వినిపిస్తున్నాయి. 1981లో చిరంజీవి, సుధాక‌ర్ ముఖ్య పాత్ర‌ల్లో న‌టించిన ఊరికిచ్చిన మాట.. అలాగే 1983లో చిరంజీవి, సుమ‌ల‌త, రంగనాథ్ ప్రధాన పాత్ర‌ల్లో న‌టించిన ఆల‌య‌శిఖ‌రం షేడ్స్ రంగ‌స్థ‌లంలో ఉంటాయ‌ని విశ్వ‌స‌నీయ వ‌ర్గాల స‌మాచార‌మ్‌. ఆ రెండు చిత్రాల‌లాగే రంగ‌స్థ‌లంలోనూ అన్న‌ద‌మ్ముల మ‌ధ్య జ‌రిగే సంఘ‌ర్ష‌ణ సినిమాకి ప్రధాన ఆక‌ర్ష‌ణ అవుతుంద‌ని తెలిసింది. ఇందులో చ‌ర‌ణ్ అన్న‌య్య‌గా ఆది పినిశెట్టి న‌టిస్తున్నాడు. మార్చి 30న ఈ సినిమా ప్రేక్ష‌కుల ముందుకు రానుంది.