సుకుమార్ దర్శకత్వంలో తెరకెక్కిన 'రంగస్థలం' ఎంతటి ఘన విజయాన్ని సాధించిందో ప్రత్యేకంగా చెప్పనక్కరలేదు. ఈ సినిమాలో ప్రతీ పాత్ర ప్రేక్షకులని ఆకట్టుకుంది. వాటిలో రామలక్ష్మి, కుమార్ బాబు పాత్రలు కూడా కీలకం. రామలక్ష్మిగా సమంత కనిపించగా.. కుమార్ బాబు పాత్రలో ఆది పినిశెట్టి ఒదిగిపోయారు.

ఈ బ్లాక్ బస్టర్ మూవీ తర్వాత వీరిద్దరూ కలిసి నటిస్తున్న సినిమా 'యు టర్న్'. కన్నడ సినిమాకి రీమేక్‌గా తెరకెక్కుతున్న ఈ చిత్రంలో సమంత జర్నలిస్ట్ పాత్రలో కనిపించ‌నుండగా.. ఆది పోలీస్ ఆఫీసర్ పాత్రలో నటించనున్నారు. మిస్టరీ థ్రిల్లర్‌గా రూపొందుతున్న ఈ మూవీ ప్రస్తుతం చిత్రీకరణ దశలో ఉంది. కన్నడ వెర్షన్‌కి దర్శకత్వం వహించిన పవన్ కుమార్ ఈ సినిమాని కూడా డైరెక్ట్ చేస్తున్నారు.

కాగా.. ఈ ఏడాదిలోనే ప్రేక్షకుల ముందుకు రానుంది ఈ చిత్రం. మ‌రి.. 'రంగస్థలం'లో ఆకట్టుకున్న సామ్, ఆది కాంబినేష‌న్ ఈ సినిమాతో మళ్ళీ ఆ మ్యాజిక్‌ను రిపీట్ చేస్తారేమో చూడాలి. తెలుగుతో పాటు త‌మిళంలోనూ విడుద‌ల కానున్న ఈ సినిమాలో సీనియ‌ర్ న‌టి భూమిక ఓ కీల‌క పాత్ర పోషిస్తోంది.