వేణు ఊడుగుల ద‌ర్శ‌క‌త్వంలో నేషనల్ స్టార్ రానా దగ్గుబాటి, సెన్సేషనల్‌ బ్యూటీ సాయిప‌ల్ల‌వి జంట‌గా రూపొందుతోన్న చిత్రం 'విరాట‌ప‌ర్వం'. ‘రివ‌ల్యూష‌న్ ఈజ్ ఏన్ యాక్ట్ ఆఫ్ ల‌వ్’ అనే ట్యాగ్‌లైన్‌తో ఈ సినిమా తెరకెక్కుతోంది. డి. సురేష్ బాబు స‌మ‌ర్ప‌ణ‌లో ఎస్‌.ఎల్‌.వి. సినిమాస్ ప‌తాకంపై సుధాక‌ర్ చెరుకూరి ఈ చిత్రాన్ని నిర్మిస్తున్నారు. ఈ సినిమాకు సంబంధించి ఇప్పటి వరకూ చిత్ర యూనిట్ వదిలిన అప్‌డేట్స్ అన్నీ ఆకట్టుకున్నాయి. తాజాగా ఈ సినిమాకు సంబంధించిన టీజర్‌ను చిత్ర యూనిట్ విడుదల చేసింది. టీజర్ చూస్తుంటే.. గూస్ బంప్స్ రావడం ఖాయం.

మెగాస్టార్ చిరంజీవి ఈ చిత్రానికి సంబంధించిన టీజర్‌ను ట్విటర్ వేదికగా గురువారం విడుదల చేశారు. టీజర్‌ను చూసి చిరు స్టోరీ టెల్లింగ్ అద్భుతంగా ఉందంటూ చిత్ర యూనిట్‌కు అభినందనలు తెలిపారు. ఇక టీజర్‌ విషయానికి వస్తే.. ‘ఆధిపత్య జాడలనే చెరిపేయగ ఎన్నినాళ్లు.. తారతమ్య గోడలనే పెకిలించగా ఎన్నినాళ్లు..’ అంటూ రానా గంభీరమైన వాయిస్‌తో చెప్పే అద్భుతమైన విప్లవ కవితతో మొదలవుతుంది. రానా కవిత్వానికి ముగ్దురాలైన సాయిపల్లవి.. శ్రీకృష్ణుడి కోసం కన్నవారిని, కట్టుకున్న వారిని వదలి వెళ్లిన మీరాలా ఆయనను వెదుక్కుంటూ వెళ్లడం.. అక్కడ ఆమె ఎదుర్కొనే పరిస్థితులు వంటి అంశాలతో ఈ టీజర్‌ను కట్ చేశారు.

చాలా కాలం తర్వాత ప్రజా సమస్యలను.. భూస్వామ్య వ్యవస్థను ఎదిరిస్తూ రూపొందిన ఒక సినిమా రాబోతోంది. అయితే ఈ సినిమా ఈ కాలానికి తగ్గట్టుగా ప్రతి ఒక్కరినీ ఆకట్టుకునేలా రూపొందించినట్టు తెలుస్తోంది. ముఖ్యంగా టీజర్‌లో సాయి పల్లవిని ఒక పోలీస్ సెర్చ్ చేసిన విధానం ఎమోషనల్‌గా ప్రతి ఒక్కరికీ కనెక్ట్ అవుతుందనడంలో సందేహం లేదు. మొత్తానికి టీజర్‌ను చూస్తుంటే సినిమాపై అంచనాలకు రెక్కలు రావడం ఖాయం అనిపిస్తోంది. బాక్సాఫీస్ షేక్ అవడంలో సందేహం లేదనిపిస్తోంది. రానా ‘అరణ్య’ పేరుతో రాసే కవితలు సినిమాకే హైలైట్ అని చెప్పవచ్చు. మొత్తానికి టీజర్ సినిమా స్థాయిని ఓ లెవల్‌కి తీసుకెళ్లింది. ఈ సినిమా ఏప్రిల్ 30న ప్రేక్షకుల ముందుకు రానుంది.