భూస్వాముల ధ‌నాన్ని కొల్లగొట్టి.. పేదలకు పంచిపెట్టే కథే రాబిన్ హుడ్ స్టోరీ. ఇటువంటి రాబిన్ హుడ్ కథతో యువ క‌థానాయ‌కుడు రానా ఓ సినిమా చేయ‌నున్నారు. తెలుగు వారి రాబిన్ హుడ్‌గా చెప్పుకునే స్టువర్టుపురం టైగర్ నాగేశ్వరరావు జీవితకథ ఆధారంగా తెరకెక్కబోయే ఈ చిత్రంలో.. రానా ప్రధాన పాత్ర పోషిస్తున్నారు.

'దొంగాట', 'కిట్టు ఉన్నాడు జాగ్రత్త' చిత్రాల ద‌ర్శ‌కుడు వంశీ కృష్ణ ఈ చిత్రాన్ని తెరకెక్కిస్తున్నారు. ఏప్రిల్ ఆఖరి వారంలో పూజా కార్యక్రమాలను జరుపుకుని.. మే మొదటివారం నుంచి ఈ సినిమా నిరవధికంగా చిత్రీకరణ జరుపుకోనుంద‌ని తెలిసింది. ఈ మూవీని ఎ.కె.ఎంటర్‌టైన్‌మెంట్స్ పతాకంపై అనిల్ సుంకర నిర్మిస్తున్నారు.

ప్రస్తుతం పూర్వ నిర్మాణ పనులను జరుపుకుంటున్న ఈ చిత్రం కోసం రానా ఓ వైవిధ్యమైన వేషధారణలో కనిపించనున్నారని చిత్ర వర్గాలు చెబుతున్నాయి. దీనికి సంబంధించి ఇప్ప‌టికే కసరత్తులు కూడా ప్రారంభించారు రానా. ఇప్పటికే రానా పలు చిత్రాల్లో నటిస్తున్నా.. 'నేనే రాజు నేనే మంత్రి' తర్వాత నేరుగా తెలుగులో చేస్తున్న చిత్రం ఇదే కావడం విశేషం.