రానా మలయాళ చిత్రం మొదలైంది
- IndiaGlitz, [Tuesday,January 30 2018]
బాహుబ‌లి సీరీస్‌తో త‌న అభిమాన‌గ‌ణాన్ని పెంచుకున్నారు యువ న‌టుడు రానా ద‌గ్గుబాటి. గ‌తేడాది ఘాజీ, బాహుబ‌లి - ది కంక్లూజ‌న్‌, నేనే రాజు నేనే మంత్రి చిత్రాలతో హ్యాట్రిక్ విజ‌యాల‌ను సొంతం చేసుకున్న రానా.. ఈ ఏడాది కూడా వైవిధ్యమైన పాత్రలు చేస్తూ దూసుకుపోతున్నారు. ప్ర‌స్తుతం రానా 1945, హాథీ మేరా సాథీ చిత్రాలతో బిజీగా ఉన్నారు.
ఈ రెండింటిలోనూ ఇంత‌కుముందు చేయ‌ని పాత్ర‌లే ఆయ‌న చేస్తుండ‌డం విశేషం. ఇదిలా ఉంటే.. రానా ఇటీవ‌లే ఓ మలయాళ చిత్రం చేయ‌డానికి అంగీక‌రించారు. ట్రావెన్కోర్ రాజు మార్తాండ వర్మ జీవిత కథ ఆధారంగా రూపొంద‌నున్న ఈ సినిమాలో మార్తాండ వ‌ర్మ‌గా రానా క‌నిపించ‌నున్నారు. 1729-1758 మ‌ధ్య కాలంలో ట్రావెన్కోర్ ప్రాంతాన్ని ప‌రిపాలించిన చ‌క్ర‌వ‌ర్తిగా రానా ద‌ర్శ‌న‌మివ్వ‌బోతున్నారు. తాజాగా.. ఈ సినిమా షూటింగ్ కూడా ప్రారంభ‌మైంది. కె.మధు దర్శకత్వంలో రూపొందుతున్న ఈ సినిమా ఈ ఏడాదే విడుద‌ల‌య్యే అవ‌కాశ‌ముంది.