Rana Daggubati : ‘‘హిరణ్య కశ్యప’’గా రానా .. సీన్‌లోకి త్రివిక్రమ్ , టాలీవుడ్‌లో మరో క్రేజీ ప్రాజెక్ట్
- IndiaGlitz, [Thursday,July 20 2023]
దగ్గుబాటి రానా.. పెద్దగా పరిచయం అక్కర్లేని పేరు. దగ్గుబాటి కుటుంబం నుంచి వచ్చిన ఈ యంగ్ హీరో. తాత, తండ్రి, బాబాయ్‌ల వారసత్వాన్ని నిలబెడుతున్నాడు. పాత్ర కోసం ప్రాణం పెడుతూ.. విలక్షణ నటుడిగా, ఎల్లప్పుడూ వైవిధ్యానికే ఇంపార్టెన్స్ ఇస్తారు రానా. కథ నచ్చిందా అందులో ఎంత రిస్క్ వున్నా చేయడానికి వెనుకాడడు. అందుకే రానా అంటే అందరికీ ఇష్టం. హీరోగా బ్లాక్ బస్టర్ అందుకుని ఆ వెంటనే మరో సినిమాలో విలన్ రోల్ వేయడానికి రెడీ అంటాడు రానా. హిట్టు ఫ్లాప్‌తో సంబంధం లేకుండా సినిమాలు చేస్తూ సాగిపోతున్నారాయన.
ప్రాజెక్ట్ కే టీమ్‌తో కలిసి అమెరికాకు రానా :
ఇటీవల స్పై , రానా నాయుడులతో ప్రేక్షకులను పలకరించిన ఆయన తన నెక్ట్స్‌ ప్రాజెక్ట్స్‌ను మాత్రం ప్రకటించలేదు. తేజతో సినిమా వుంటుందని మాత్రం స్పష్టం చేశారు. ఈ నేపథ్యంలో ఎవ్వరూ ఊహించని విధంగా మరో సినిమాను అనౌన్స్ చేశారు రానా. ప్రఖ్యాత శాన్ డియాగో కామిక్ కాన్ వేడుకల్లో పాల్గొనేందుకు గాను ప్రాజెక్ట్ కే టీమ్‌తో కలిసి రానా అమెరికా వెళ్లిన సంగతి తెలిసిందే. అక్కడే తన కొత్త ప్రాజెక్ట్ వివరాలను వెల్లడించారు. అదే ‘‘హిరణ్య కశ్యప’’. అమరచిత్ర కథలు ఆధారంగా ఈ సినిమా తెరకెక్కనుంది. మాటల మాంత్రికుడు త్రివిక్రమ్ శ్రీనివాస్ ఈ చిత్రానికి కథ అందించనున్నారు.
రానాతో హిరణ్య కశ్యప తీయాలనుకున్న గుణశేఖర్ :
అయితే రానా హీరోగా ‘హిరణ్య కశ్యప’ను తీస్తానని గతంలోనే దర్శకుడు గుణశేఖర్ ప్రకటించిన సంగతి తెలిసిందే. అయితే ఆయన సమంతతో శాకుంతలం చిత్రంతో బిజీ కావడం, ఇతరత్రా కారణాలతో ఈ ప్రాజెక్ట్‌ను పక్కనబెట్టారు. మరి ఇప్పుడు రానా ప్రకటించిన హిరణ్య కశ్యపకు దర్శకత్వం వహించేది గుణశేఖరేనా..? లేక మరొకరా అన్నది తెలియాల్సి వుంది. గుణశేఖరే డైరెక్టర్ అయితే ఆయన పేరుని రానా వెల్లడించేవారు. తాజా ప్రకటన బట్టి చూస్తుంటే వేరే దర్శకుడితో ఈ సినిమాని తెరకెక్కించే అవకాశం ఉందని ఫిలింనగర్ టాక్.