అనారోగ్యంతో మరణించిన సినీనటుడు, నిర్మాత నటుడు, నిర్మాత రమేశ్‌ బాబు అంత్యక్రియలు ముగిశాయి. కాలేయ సంబంధిత వ్యాధితో బాధపడుతున్న ఆయన శనివారం రాత్రి కన్నుమూసిన సంగతి తెలిసిందే. హైదరాబాద్ జూబ్లీహిల్స్‌ మహాప్రస్థానంలో నిర్వహించిన రమేశ్‌బాబు అంత్యక్రియల్లో ఘట్టమనేని కుటుంబసభ్యులు, పలువురు సినీ ప్రముఖులు పాల్గొని కన్నీటి వీడ్కోలు పలికారు. ఆయన ఆకస్మిక మరణంతో సినీ పరిశ్రమ శోకసంద్రంలో మునిగిపోయింది.

అంత్యక్రియలకు ముందు రమేశ్‌‌బాబు పార్థివ దేహాన్ని అభిమానులు, కుటుంబసభ్యుల సందర్శనార్థం పద్మాలయ స్టూడియోలో ఉంచారు. స్టూడియోకి చేరుకున్న కృష్ణ, ఆయన సతీమణి ఇందిరాదేవి రమేశ్ బాబు పార్థివదేహాన్ని చూసి కన్నీరుమున్నీరుగా విలపించారు. అయితే కరోనా సోకిన కారణంగా మహేశ్‌బాబు, ఆయన కుటుంబం ఐసోలేషన్‌లో వుండటంతో రమేశ్ అంత్యక్రియలకు హాజరుకాలేకపోయారు.

ప్రస్తుత కోవిడ్ పరిస్థితుల్లో అంత్యక్రియలు త్వరగా ముగించాలని కృష్ణ కుటుంబ సభ్యులు భావించారు. రమేశ్‌ బాబు అంతిమ కార్యక్రమాలకు ఎక్కువమంది హాజరు కావొద్దని కృష్ణ ఫ్యామిలీ ఇప్పటికే విజ్ఞప్తి చేసింది. రెండేళ్ల క్రితం సతీమణి విజయ నిర్మల మరణించగా.. ఇప్పుడు కుమారుడి మరణంతో కృష్ణకు పెద్ద షాక్ తగిలినట్లయ్యింది. దీంతో ఆయనను ఓదార్చడం ఎవరితరం కావడం లేదు.