ஒருகாலத்தில் திமுகவும், பாமகவும் கூட்டணி கட்சியாக இருந்தாலும் கடந்த சில வருடங்களாக இரு கட்சியினர்களும் எதிரும் புதிருமாக உள்ளனர். கடந்த சட்டமன்ற தேர்தலில் கூட பாமக தனித்து போட்டியிட்டது. இனிமேலும் இந்த இரு கட்சிகள் கூட்டணி சேர வாய்ப்பில்லை என்றே அரசியல் விமர்சகர்கள் கூறி வருகின்றனர்.

இந்த நிலையில் நேற்று திமுக செயல் தலைவர் மு.க.ஸ்டாலின் ஸ்ரீரங்கம் கோவிலுக்கு சென்று சுக்கிரபுத்திரி யாகம் செய்ததாக செய்திகள் வெளிவந்தது. கர்நாடக சட்டமன்ற தேர்தலுக்கு முன்னர் குமாரசாமி இதே ஸ்ரீரங்கம் கோவிலில் இந்த யாகம் செய்ததாகவும், அதனால்தான் அவர் முதலமைச்சர் ஆனதாகவும் கூறப்படுகிறது. எனவே ஸ்டாலின் அவர்களும் தமிழகத்தில் முதலமைச்சர் ஆகவே இந்த யாகம் செய்ததாக அரசியல் வட்டாரங்கள் கூறுகின்றன.

இதுகுறித்து பாமக தலைவர் டாக்டர் ராம்தாஸ் அவர்கள் தனது சமூக வலைத்தளத்தில் கூறியபோது, 'கண்ணாடியை திருப்பி வைத்தால் ஆட்டோ ஸ்டார்ட் ஆகும் என்ற அஜித் பட நகைச்சுவைக்கு அடுத்தப்படியாக, ஆகச் சிறந்த மூட நம்பிக்கை என்பது சுக்கிரபுத்திரி யாகம் நடத்தினால் முதலமைச்சர் ஆகிவிடலாம் என்பது தான்! என்று கூறியுள்ளார். அஜித் பட காட்சியை உதாரணமாக கூறி ராம்தாஸ் கூறியுள்ள இந்த டுவீட் பெரும் பரபரப்பை ஏற்படுத்தியுள்ளது.