హిట్టు ఫ్లాపులతో సంబంధం లేకుండా నచ్చిన దారిలో సినిమాలు చేసుకుంటే వెళ్లే స్టార్స్‌లో రామ్ పొతినేని కూడా ఒకరు. ఎనర్జిటిక్ హీరోగా యూత్‌లో మంచి ఫాలోయింగ్ వున్న రామ్‌ ఇటీవల వెరైటీ కథలతో ముందుకు వస్తున్నారు. డాషింగ్ డైరెక్టర్‌ పూరి జగన్నాథ్‌ దర్శకత్వంలో ఆయన నటించిన ఇస్మార్ట్ శంకర్ మంచి విజయాన్ని అందుకుంది. ఆ వెంటనే రామ్ చేసిన రెడ్ పెద్దగా ఆకట్టుకోలేదు. మరో వైపు ప్రస్తుతం పాన్ ఇండియా కల్చర్ ఊపందుకోవడంతో ఆ దిశగా అడుగులు వేస్తున్నారు రామ్. దీనిలో భాగంగా తమిళ స్టార్ డైరెక్టర్ లింగు స్వామి దర్శకత్వంలో రామ్ నటించిన యాక్షన్ డ్రామా ‘‘ది వారియర్’’. ఇప్పటికే రిలీజ్ అయిన పోస్టర్లకు మంచి రెస్పాన్స్ వచ్చింది.

తాజాగా రామ్ పుట్టినరోజును పురస్కరించుకుని శనివారం ‘ది వారియర్ ’ నుంచి టీజర్‌ను వదిలారు మేకర్స్. తొలిసారిగా పోలీస్ గెటప్‌లో నటించిన రామ్ ఇరగదీశాడు. ‘ఈ పోలీసోళ్ల టార్చర్ భరించలేకపోతున్నాం అబ్బా’ అనే వాయిస్ ఓవర్ తో టీజర్ స్టార్ అవుతుంది. ‘పాన్ ఇండియా సినిమా చూసి ఉంటారు.. పాన్ ఇండియా రౌడీని చూశారా.. మై డియర్ గ్యాంగ్ స్టార్స్ వీలైతే మారిపోండి.. లేదంటే పారిపోండి ఇదేనేను మీకిచ్చే ఫైనల్ వార్నింగ్’ అంటూ రామ్ చెప్పే డైలాగ్స్‌కి థియేటర్లో కేకలే.

ఇక రామ్‌కు థీటుగా విలన్‌గా కనిపిస్తున్నారు ఆది పినిశెట్టి. ఫైట్స్, డైలాగ్ డెలివరీలో రామ్‌కు ఆది ఎక్కడా తగ్గడం లేదు. అటు విజిల్ మహాలక్ష్మి పాత్రలో కృతి శెట్టి కనిపిస్తున్నారు. సినిమాలో వీరిద్దరి రొమాన్స్ నెక్ట్స్ లెవల్‌లో ఉండనున్నట్టు తెలుస్తోంది. రాక్‌స్టార్ దేవిశ్రీ ప్రసాద్ సంగీతం ఈ సినిమాకు అదనపు బలంగా వుండనుంది. శ్రీనివాస సిల్వర్ స్క్రీన్ బ్యానర్ పై తెరకెక్కుతున్న ఈ చిత్రాన్ని శ్రీనివాస చిత్తూరి నిర్మిస్తున్నారు. జులై 14న తెలుగు, తమిళ భాషల్లో ప్రపంచవ్యాప్తంగా ‘ది వారియర్’ మూవీ రిలీజ్ కానుంది.