'సినిమా చూపిస్త మావ‌', ‘నేను లోకల్’ చిత్రాల‌తో వ‌రుస విజ‌యాలు అందుకున్నారు దర్శకుడు త్రినాథ‌రావు నక్కిన. ప్రస్తుతం ‘హలో గురు ప్రేమ కోసమే’ సినిమాను తెర‌కెక్కిస్తున్నారు ఈ డైరెక్టర్. ఎనర్జిటిక్ స్టార్ రామ్, కేర‌ళ కుట్టి అనుపమ పరమేశ్వరన్, క‌న్న‌డ బ్యూటీ ప్రణీత నాయకానాయికలుగా రూపుదిద్దుకుంటున్న ఈ చిత్రం శరవేగంగా చిత్రీకరణ జరుపుకుంటోంది. ప్రస్తుతం కాకినాడలో కొన్ని స‌న్నివేశాల‌ను చిత్రీకరిస్తోంది చిత్ర బృందం.

ఈ షెడ్యూల్‌లో పోసాని కృష్ణ మురళి కూడా పాల్గొన‌బోతున్నారు. గత చిత్రాల మాదిరిగానే తన మార్కు ఎంటర్‌టైన్‌మెంట్‌తో ద‌ర్శ‌కుడు ఈ సినిమాని రూపొందిస్తున్నార‌ని చిత్ర వ‌ర్గాలు పేర్కొంటున్నాయి. దీనికితోడు రామ్ ఎనర్జి కూడా ఈ సినిమాకి ప్లస్ అవుతుందని అంటున్నారు. ప్రకాష్ రాజ్ ఓ కీలక పాత్రలో కనిపిస్తున్న ఈ చిత్రానికి దేవిశ్రీ ప్రసాద్ సంగీతం అందిస్తున్నారు. కాగా.. టాలీవుడ్ సక్సెస్‌ఫుల్ ప్రొడ్యూసర్ ‘దిల్’ రాజు నిర్మిస్తున్న ఈ మూవీ సెప్టెంబర్ నెలలో ప్రేక్షకుల ముందుకు రానుంది.