రామ్ కు సెకండ్ హీరోయిన్ దొరికిందా?
- IndiaGlitz, [Tuesday,March 06 2018]
యువ కథానాయకుడు రామ్, దర్శకుడు త్రినాథ‌రావు నక్కిన కాంబినేషన్లో ఓ సినిమా తెరకెక్కబోతున్న విషయం తెలిసిందే. సక్సెస్‌ఫుల‌్ ప్రొడ్యూసర్ దిల్ రాజు నిర్మాణంలో రూపుదిద్దుకోబోతున్న ఈ చిత్రం.. వచ్చే వారం నుంచి చిత్రీకరణను జరుపుకోనుంది. లవ్ అండ్ ఫ్యామిలీ ఎంటర్‌టైన‌ర్‌గా రూపుదిద్దుకుంటున్న ఈ చిత్రంలో.. రామ్ డిఫరెంట్ లుక్‌తో కనిపించనున్నారు. ఇదిలా ఉంటే.. ఇద్దరు హీరోయిన్లకు అవకాశం ఉన్న ఈ చిత్రంలో.. ఇప్ప‌టికే ఓ హీరోయిన్‌గా అనుపమ పరమేశ్వరన్ ఎంపికైన విషయం తెలిసిందే.
తాజాగా.. రెండో హీరోయిన్‌గా లై' ఫేమ్ మేఘా ఆకాష్‌ను ఎంపిక చేశార‌ని తెలుస్తోంది. రామ్, అనుపమ జంటగా ఉన్నది ఒకటే జిందగీ'లో నటించిన విషయం విదితమే. ఈ చిత్రంలో లావణ్య త్రిపాఠి స్థానంలో ముందుగా మేఘా ఆకాష్‌నే ఎంపికైంది. అయితే కొన్ని కారణాల వల్ల ఆమె స్థానంలోకి లావణ్య త్రిపాఠి వ‌చ్చింది. అప్పుడు అలా చేజారిన అవకాశం.. ఇప్పుడు అదే హీరో, హీరోయిన్, సంగీత దర్శకుడు (దేవిశ్రీ ప్ర‌సాద్‌) కాంబినేషన్లో రూపుదిద్దుకుంటున్న సినిమా కోసం రావ‌డం విశేష‌మనే చెప్పాలి. మేఘ ఎంట్రీపై త్వ‌ర‌లోనే క్లారిటీ వ‌స్తుంది.