సంచలన దర్శకుడు రామ్‌గోపాల్ వర్మ మరోసారి ఏపీ రాజకీయాలను టార్గెట్ చేసిన సంగతి తెలిసిందే. 2019 ఎన్నికలకు ముందుకు ‘‘లక్ష్మీస్ ఎన్టీఆర్’’ సినిమాతో వచ్చిన ఆయన.. 2024 ఎన్నికలకు ముందు కూడా రెండు సినిమాలతో ఆర్జీవీ గురిపెట్టారు. ఏపీ సీఎం వైఎస్ జగన్మోహన్ రెడ్డి జీవితం ఆధారంగా ఓ సినిమాను తెరకెక్కిస్తున్నారు. వ్యూహం, శపథం అంటూ రెండు భాగాలుగా ఈ మూవీ ప్రేక్షకుల ముందుకురానుంది.

తొలి భాగంలో వైఎస్ రాజశేఖర్ రెడ్డి మరణం తర్వాత జరిగిన ఘటనలు, రెండో భాగంలో జగన్ ఎలా సీఎం అయ్యాడు, అందుకు దారి తీసిన కారణాలను చూపించనున్నారు ఆర్జీవీ. ఇప్పటికే పాత్రలను పరిచయం చేసి సంచలనం సృష్టించారు రామ్ గోపాల్ వర్మ. తాజాగా ‘‘వ్యూహం’’ నుంచి ఇంటెన్స్ పోస్టర్ రిలీజ్ చేశారు మేకర్స్. తమ పోస్టర్లతోనే కథను చెప్పి ట్రెండ్ చేయగల పోస్టర్ డిజైనర్స్.. అనిల్ అండ్ భాను అని వర్మ ట్వీట్ చేశారు.

ఈ పోస్టర్‌లో జగన్ పాత్రను పోషించిన అజ్మల్ చుట్టూ చదరంగంలోని పావులు వాటి పక్కన పలు కోణాల్లో ఆయన ఆలోచిస్తున్న గెటప్స్ వుంటాయి. కుట్రలకు, ఆలోచలనకు మధ్యలో అసామాన్యుడిగా ఎదిగిన నాయకుని కథే ‘‘వ్యూహం’’ అని పోస్టర్‌లో రాశారు. ఈ సినిమాను ఎక్కడా కాంప్రమైజ్ కాకుండా తెరకెక్కిస్తున్నారు రామ్ గోపాల్ వర్మ. చిత్రీకరణ దాదాపు 50 శాతం పూర్తయ్యిందని నిర్మాత దాసరి కిరణ్ కుమార్ తెలిపారు. రామదూత క్రియేషన్స్ పతాకంపై నిర్మితమవుతున్న వ్యూహంలో జగన్‌ పాత్రలో అజ్మల్‌, భారతి పాత్రలో మానస నటించనున్నారు. ఈ సినిమాకు సినిమాటోగ్రాఫర్ గా సుజీష్‌ రాజేంద్రన్, ఎడిటర్‌ గా మనీష్‌ ఠాకూర్ పనిచేస్తున్నారు. త్వరలోనే వ్యూహం ప్రేక్షకుల ముందుకు రానుంది. మరి ఈ రెండు భాగాలతో ఆర్జీవీ ఎలాంటి సంచలనాలను సృష్టిస్తారో చూడాలి.