ரஜினியை கடத்த திட்டமா?
- IndiaGlitz, [Tuesday,May 17 2016]
பிரபல இயக்குனர் ராம்கோபால் வர்மா, தனது சமூக வலைத்தளத்தில் அவ்வப்போது சர்ச்சைக்குரிய கருத்துக்களை கூறி பாராட்டும் கண்டனங்களையும் பெற்று வருவது வாடிக்கையே.
அந்த வகையில் தற்போது ரஜினி குறித்த ஒரு கருத்தை அவர் தன்னுடைய சமூக வலைத்தளத்தில் தெரிவித்துள்ளார். கடந்த 2000ஆம் ஆண்டு சந்தனக்கடத்தல் வீரப்பன் கன்னட சூப்பர் ஸ்டார் ராஜ்குமாரை கடத்தி 108 நாட்கள் வரை தன்னுடைய கட்டுப்பாட்டில் வைத்திருந்தது அனைவரும் அறிந்ததே. பின்னர் நடத்தப்பட்ட பேச்சுவார்த்தைக்கு பின்னர் ராஜ்குமார் விடுவிக்கப்பட்டார்.
இந்நிலையில் வீரப்பன் உண்மையில் ரஜினியைத்தான் கடத்த திட்டமிட்டிருந்ததாகவும், ஆனால் அதற்கு பதில் ராஜ்குமாரை கடத்தியதாகவும் ராம்கோபால் வர்மா, அதிர்ச்சி தகவல் ஒன்றை தெரிவித்துள்ளார்.
கடந்த 2004ஆம் ஆண்டு காவல்துறை அதிகாரி விஜயகுமார் தலைமையிலான தனிப்படை வீரப்பனை சுட்டுகொன்றது என்பது குறிப்பிடத்தக்கது. வீரப்பன் குறித்து ராம்கோபால் வர்மா இயக்கிய 'வீரப்பன்' என்ற திரைப்படம் வரும் 27ஆம் தேதி ரிலீஸ் ஆகவுள்ள நிலையில் ராம்கோபால் வர்மாவின் இந்த கருத்து பெரும் பரபரப்பை ஏற்படுத்தியுள்ளது என்பது குறிப்பிடத்தக்கது.