మెగాప‌వ‌ర్‌స్టార్ రామ్‌చ‌ర‌ణ్ ప్ర‌స్తుతం రాజ‌మౌళి ద‌ర్శ‌క‌త్వంలో యంగ్ టైగ‌ర్ ఎన్టీఆర్ హీరోగా ‘ఆర్ఆర్ఆర్ (రౌద్రం ర‌ణం రుధిరం‌)’లో న‌టిస్తోన్న సంగ‌తి తెలిసిందే. కోవిడ్ ప్రభావం తర్వాత ట్రిపులార్ షూటింగ్‌ను స్టార్ట్ చేసిన సంగ‌తి తెలిసిందే. ఈ సినిమా త‌ర్వాత ‘ఆచార్య‌’ సినిమా షూటింగ్‌ను కూడా చ‌ర‌ణ్ పూర్తి చేయాల్సి ఉంది. ఇవి రెండు పూర్తి కాగానే ఏ సినిమాలో చెర్రీ న‌టిస్తాడ‌నే దానిపై క్లారిటీ లేదు. రామ్‌చ‌ర‌ణ్ ఏ సినిమా చేయ‌బోతున్నాడ‌నే దానిపై ఇండ‌స్ట్రీలో స‌ర్వ‌త్రా ఆస‌క్తి నెల‌కొంది. చ‌ర‌ణ్ త‌దుప‌రి సినిమా డైరెక్ట‌ర్స్‌పై ప‌లువురి పేర్లు వినిపించాయి. కొర‌టాల శివ‌, గౌత‌మ్ తిన్న‌నూరి, అనీల్ రావిపూడి, వెంకీ కుడుముల‌ త‌దిత‌రుల పేర్లు ప్ర‌ముఖంగా వినిపించాయి.

అయితే లేటెస్ట్ స‌మాచారం మేర‌కు లాక్‌డౌన్ స‌మ‌యంలో క‌థ‌లు వింటూ వ‌చ్చిన రామ్‌చ‌ర‌ణ్ .. తాజాగా కోలీవుడ్ డైరెక్ట‌ర్ మోహ‌న్‌రాజా ద‌ర్శ‌క‌త్వంలో సినిమా చేయ‌డానికి ఓకే చెప్పిన‌ట్లు స‌మాచారం. చ‌ర‌ణ్ హీరోగా చేసిన దృవ సినిమాకు మాతృక త‌నీఒరువ‌న్ చిత్రాన్ని తెర‌కెక్కించింది మోహ‌న్‌రాజానే. అప్ప‌ట్లోనే చ‌ర‌ణ్‌, మోహ‌న్ రాజా కాంబినేష‌న్‌లో ఓ సినిమా రూపొందాల్సింది కానీ.. ఎందుక‌నో ఆగింది. ఇప్పుడు వీరి కాంబోలో సినిమా రానుంద‌ని వార్త‌లు వినిపిస్తున్నాయి. మరి ఇందులో నిజానిజాలు తెలియాలంటే కొన్ని రోజులు ఆగాల్సిందే.