ఎస్ఎస్ రాజమౌళి దర్శకత్వంలో ఎన్టీఆర్‌తో కలిసి నటించిన ఆర్ఆర్ఆర్ మంచి విజయాన్ని అందుకోవడంతో సక్సెస్ జోష్‌లో వున్నారు మెగా పవర్ స్టార్ రామ్ చరణ్ తేజ్. వరుసపెట్టి ప్రమోషన్ కార్యక్రమాలు, ఇంటర్వ్యూలు, పార్టీలతో బిజీగా గడిపిన చరణ్ కొద్దిరోజులు విశ్రాంతి తీసుకున్నారు. ఈ సక్సెస్ జోష్‌లో వుండగానే తన తదుపరి సినిమాల మీదా దృష్టి పెట్టారు చెర్రీ. ప్రస్తుతం ఆయన తమిళ దర్శక దిగ్గజం శంకర్ దర్శకత్వంలో నటిస్తున్న సంగతి తెలిసిందే. ఇది రామ్ చరణ్ కెరీర్‌లో 15వ సినిమా. అందుకే ఈ విషయంలో అన్ని జాగ్రత్తలు తీసుకుంటున్నారు చెర్రీ.

ఈ నేపథ్యంలో RC15 షూటింగ్ లో పాల్గొనడానికి పంజాబ్‌లోని అమృత్‌సర్‌లో అడుగుపెట్టాడు రామ్ చరణ్ . అయితే కొన్ని రోజుల వ్యవధిలో ఆయన పంజాబ్‌ రాష్ట్రానికి వెళ్లడం ఇది రెండవసారి. ఇటీవల ఆర్ఆర్ఆర్ మూవీ విడుదలకు ముందు అమృత్‌సర్‌లోని ప్రఖ్యాత గోల్డెన్ టెంపుల్‌ని ఎన్టీఆర్, రాజమౌళితో కలిసి చరణ్ సందర్శించారు. అమృత్‌స‌ర్‌లో ఒక యూనివర్సిటీలో ఈ మూవీ షూటింగ్ జరుగుతున్నట్టు సమాచారం. ఇప్పటికే పుణె, రాజమండ్రి, హైదరాబాద్‌లో షెడ్యూల్ పూర్తయ్యింది. తాజా షెడ్యూల్ ఈ నెలాఖరు వరకు వుంటుందని సమాచారం.

తాజాగా శంకర్ దర్శకత్వంలో తెరకెక్కుతున్న RC15 షూటింగ్ లో పాల్గొనడానికి రామ్‌చరణ్ అమృత్‌సర్ ఎయిర్‌పోర్ట్‌లో దిగాడు. చరణ్ తనతో పాటు తన పెంపుడు కుక్క రైమ్‌ని కూడా అమృత్‌సర్‌కి తీసుకెళ్లాడు. ఈ సందర్భంగా చరణ్ చెప్పులు లేకుండా అయ్యప్ప మాలలో వున్న ఫోటోలు వైరల్ అవుతున్నాయి. తెలుగు , తమిళం, హిందీ భాషల్లో పాన్ ఇండియా సినిమాగా తెరకెక్కుతున్న RC15లో చెర్రీకి జోడిగా బాలీవుడ్ నటి కియారా అద్వానీ నటిస్తున్నారు. ఈ సినిమాలో చరణ్ రెండు గెటప్స్ లో కనపడనున్నట్టు ఫిలింనగర్ టాక్. ఈ నేపథ్యంలో చరణ్ కొత్త గెటప్ ఒకటి లీక్ అయింది. ఇందులో ఖద్దరు చొక్కా వేసుకొని, పంచె కట్టుకొని సైకిల్ తొక్కుకుంటూ వెళ్తున్నాడు మెగా పవర్ స్టార్. ఈ ఫోటో సోషల్ మీడియాలో వైరల్ అవుతుంది.