క్రైమ్ థ్రిల్లర్ గా 'రంగస్థలం'?
- IndiaGlitz, [Thursday,February 22 2018]
సుకుమార్.. త‌ను తీసే సినిమాలనే కాదు, థియేటర్లో కూర్చునే ప్రేక్షకుల బ్రెయిన్‌ను కూడా తన కంట్రోల్‌లోకి తెచ్చుకునే బ్రిలియంట్ డైరెక్టర్. ఆయన సినిమాలు తెరపై చూస్తున్నంత సేపు.. ప్రతీ సన్నివేశం ఆమోదయోగ్యంగానే అనిపిస్తుంది. బయటికి వచ్చిన తర్వాత కూడా మెదడుకి మేతలా ఉంటాయి ఈ దర్శకుడి కథ, కథనాలు. ప్రస్తుతం రామ్ చరణ్, సమంత జంటగా సుకుమార్ తెరకెక్కించిన రంగస్థలం' చిత్రం కూడా బ్రెయిన్ గేమ్ లానే ఉంటుందని సమాచారం. ఇంతవరకు ఈ సినిమా ఫీల్ గుడ్ లవ్ స్టొరీ అనే అందరికి తెలుసు. దీన్ని నిజం చేస్తూ.. ఇటీవ‌ల విడుదల చేసిన “ఎంత సక్కగున్నావే” లిరికల్ వీడియో కూడా లవ్ స్టొరీనే తలపించింది. అయితే ఇప్పుడు ఈ సినిమాకి సంబంధించి మరో విషయం వెలుగులోకి వచ్చింది.
ఈ చిత్రం అందరూ అనుకున్నట్టు ఫీల్ గుడ్ లవ్ స్టొరీ మాత్రమే కాద‌ట. ప్ర‌ధానంగా ఒక మర్డర్ మిస్టరీని ఛేదించే థ్రిల్లర్ మూవీగా ఈ సినిమాని సుక్కు తెరకెక్కించారని విశ్వసనీయ సమాచారం. చిత్రంలో రామ్ చరణ్ అన్నయ్య పాత్ర(ఆది)ను ఎవరో చంపేస్తారని.. హంతకుడు ఎవరో కనిపెట్టే దిశగా కథ సాగుతుందని వార్తలు వినిపిస్తున్నాయి. ఈ సినిమాలో రామ్ చరణ్ బధిరుడుగా నటిస్తున్న విషయం తెలిసిందే. ఇక సమంత మూగ అమ్మాయిగా నటించిందని తెలుస్తోంది. ఈ నేపథ్యంలో హత్యా ఉదంతాన్ని చూసిన సమంత.. రామ్ చరణ్‌కు ఆ విష‌యాన్ని ఎలా చెప్పింది అన్నదే కథ అని టాలీవుడ్ టాక్. గతంలో మెమరీ లాస్ ఉన్న హీరో.. మర్డర్ మిస్టరీని ఛేదించడం చూశాం. ఇప్పుడు మూగ, చెవుడు ఉన్నవారు మర్డర్ మిస్టరీని ఛేదించడం చూడబోతున్నామ‌న్న‌మాట. ఏదైనా సుక్కు స్టైలే వేరబ్బా అంటున్నారు అభిమానులు.