'రంగస్థలం' ఇచ్చిన విజయంతో.. ఇప్పుడు ఫుల్ జోష్‌లో ఉన్నారు మెగాప‌వ‌ర్ స్టార్‌ రామ్ చరణ్. ఈ రోజు (శుక్ర‌వారం) జరగబోయే విజయోత్సవ వేడుకలలో కూడా చరణ్ పాల్గోనున్నారు. ఈ వేడుకల తర్వాత చరణ్ ఫ్రీ కానుండడంతో.. బోయపాటి శ్రీను డైరెక్షన్‌లో చేయబోయే తన తదుపరి చిత్రంపై పూర్తిస్థాయిలో దృష్టి సారించనున్నారు.

ఇప్పటికే ఈ చిత్రం తొలి షెడ్యూల్‌ను పూర్తిచేసుకుంది. చరణ్ లేని సన్నివేశాలను ఈ షెడ్యూల్‌లో చిత్రీకరించారు. కాగా.. రెండో షెడ్యూల్‌ను ఈ నెలాఖరు నుంచి ప్రారంభిస్తారనీ.. చరణ్ కూడా ఈ షెడ్యూల్‌లో పాల్గొంటారని సమాచారం. డి.వి.వి.ఎంటర్‌టైన్‌మెంట్స్ పతాకంపై డి.వి.వి.దానయ్య నిర్మిస్తున్న‌ ఈ సినిమాలో కియారా అద్వాని కథానాయికగా నటిస్తున్న సంగ‌తి తెలిసిందే.

బోయపాటి సినిమా అంటేనే యాక్షన్ సీన్స్‌కి పెట్టింది పేరు. అందుకే పవర్ ఫుల్ విలన్ పాత్రలో బాలీవుడ్ నటుడు వివేక్ ఒబెరాయ్‌ని రంగంలోకి దింపారు ఈ యాక్షన్ చిత్రాల‌ డైరెక్టర్. ఓ పక్క తన మార్కు యాక్షన్‌తో తెరపై సందడి చేస్తూనే.. మరో పక్క ఫ్యామిలీ ఆడియన్స్‌కి కనెక్ట్ అయ్యే విధంగా సినిమాను తెరకెక్కిస్తున్నారు బోయపాటి.  దేవిశ్రీ ప్ర‌సాద్‌ స్వరాలను సమకూరుస్తున్న ఈ సినిమాని దసరా కానుకగా విడుదల చేయడానికి చిత్ర బృందం ప్రయత్నిస్తోంది.