'రంగ‌స్థ‌లం' ఘ‌న‌విజ‌యంతో మ‌ళ్ళీ ఫామ్‌లోకి వ‌చ్చేశారు మెగా ప‌వ‌ర్ స్టార్ రామ్ చ‌ర‌ణ్‌. ప్ర‌స్తుతం మాస్ మ‌సాలా చిత్రాల ద‌ర్శ‌కుడు బోయ‌పాటి శ్రీ‌నుతో ఓ సినిమా చేస్తున్నారు ఈ యువ క‌థానాయ‌కుడు. ఫ్యామిలీ యాక్ష‌న్ ఎంట‌ర్‌టైన‌ర్‌గా రూపొందుతున్న ఈ సినిమాలో కియారా అద్వానీ హీరోయిన్‌గా న‌టిస్తుండ‌గా.. ఇత‌ర ముఖ్య పాత్ర‌ల్లో వివేక్ ఒబెరాయ్‌, ప్ర‌శాంత్‌, స్నేహ‌, ఆర్య‌న్ రాజేష్ న‌టిస్తున్నారు. డి.వి.వి.ఎంట‌ర్‌టైన్‌మెంట్ ప‌తాకంపై డి.వి.వి.దాన‌య్య ఈ చిత్రాన్ని నిర్మిస్తున్నారు.

ప్ర‌స్తుతం ఈ సినిమా చిత్రీక‌ర‌ణ శ‌ర‌వేగంగా జ‌రుగుతోంది. ఇదిలా ఉంటే.. ఈ సినిమాని సంక్రాంతి కానుక‌గా విడుద‌ల చేయ‌బోతున్న‌ట్లు ఇటీవ‌లే చిత్ర బృందం ప్ర‌క‌టించింది. తాజా స‌మాచారం ప్ర‌కారం.. ఈ సినిమా విడుద‌ల తేదిని జ‌న‌వ‌రి 11గా అనుకుంటున్న‌ట్లు తెలుస్తోంది.

విశేష‌మేమిటంటే.. మెగాస్టార్ చిరంజీవి రీ ఎంట్రీ మూవీ ఖైదీ నంబ‌ర్ 150 కూడా ఇదే తేదిన విడుద‌లై సంచ‌ల‌న విజ‌యం సాధించింది. సెంటిమెంట్‌ను ఫాలో కానున్న చ‌ర‌ణ్ మూవీ కూడా అదే బాట‌లో వెళుతుందేమో చూడాలి.