మెగాపవర్ స్టార్ రామ్ చరణ్, మాస్ డైరెక్టర్ బోయపాటి శ్రీను కలయికలో ఓ సినిమా తెరకెక్కబోతున్న విషయం తెలిసిందే. తాజాగా.. ఈ సినిమా రెగ్యులర్ షూటింగ్ కూడా ప్రారంభమైంది. బాలీవుడ్ బ్యూటీ కైరా అద్వాని ఇందులో కథానాయికగా న‌టిస్తుండ‌గా... బాలీవుడ్ నటుడు వివేక్ ఒబెరాయ్ ప్రతినాయకుడిగా కనిపించనున్నాడు. హీరోలను చాలా ప్రత్యేకంగా చూపించే బోయపాటి ఈ చిత్రంలో రామ్ చరణ్‌ని ఎలా చూపించబోతున్నాడోనని మెగాభిమానులు ఆస‌క్తిగా ఎదురుచూస్తున్నారు.

అలాగే బోయ‌పాటి సినిమాల్లో విల‌న్ పాత్ర‌లు కూడా ప్ర‌త్యేకంగా ఉంటాయి. ఇప్ప‌టికే వివేక్‌ ఒబెరాయ్ లాంటి న‌టుడిని విలన్‌గా ఎంపిక చేసుకోవ‌డంతో.. ఈ సినిమాలో యాక్షన్ సన్నివేశాలు ఏ రేంజ్ లో ఉండబోతున్నాయో చెప్పకనే చెప్పారు దర్శకుడు. ఇదిలా ఉంటే.. దొంగ దొంగ`, జీన్స్`, 'జోడి' సినిమాలతో తెలుగు ప్రేక్షకులకి దగ్గరైన తమిళ హీరో ప్రశాంత్.. ఈ మూవీలో రామ్ చరణ్‌కి అన్నయ్య పాత్ర పోషిస్తున్నట్లు ఇండస్ట్రీ టాక్. ఈ పాత్ర‌, చ‌ర‌ణ్‌కి వ‌దిన‌గా ఉండే స్నేహ పాత్ర సినిమాలో కీల‌కంగా ఉంటాయ‌ని తెలిసింది. ద‌స‌రాకి ఈ సినిమా ప్రేక్ష‌కుల ముందుకు రానుంది.