మెగాపవర్ స్టార్ రామ్ చరణ్ హీరోగా యాక్షన్ మూవీస్ స్పెషలిస్ట్ బోయపాటి శ్రీను దర్శకత్వంలో ఓ చిత్రం తెరకెక్కుతున్న విషయం విదితమే. డి.వి.వి.దానయ్య నిర్మిస్తున్న ఈ చిత్రంలో కియారా అద్వానీ హీరోయిన్‌గా నటిస్తోంది. ఫ్యామిలీ అండ్ యాక్షన్ ఎంటర్‌టైనర్‌గా రూపుదిద్దుకుంటున్న ఈ చిత్రం షూటింగ్ శరవేగంగా జరుగుతోంది.

కొన్ని కీలకమైన ఎమోషనల్ సీన్స్, పాటలు మినహా టాకీ పార్టును జూలై మొదటి వారంలోగా పూర్తి చేయడానికి చిత్ర యూనిట్ ప్లాన్ చేస్తోంది. మరోవైపు.. పాటలను చిత్రీకరించేందుకు జూలై మొదటి వారంలో యూరోప్, జార్జియా బయలుదేరనుంది చిత్ర బృందం. ఈ మేరకు ఇప్పటికే కొన్ని లొకేషన్లను కూడా సెలెక్ట్ చేసిన‌ట్టు సమాచారం.

యూర‌ప్ షెడ్యూల్ పూర్తిచేసి వచ్చాక మిగిలిన కీలకమైన ఎమోషనల్ సీన్స్‌ను చిత్రీకరించేందుకు సన్నాహాలు చేస్తున్నట్టు చిత్ర స‌న్నిహిత‌ వర్గాలు చెబుతున్నాయి. న‌వంబ‌ర్ క‌ల్లా చిత్రీక‌ర‌ణ పూర్తి చేసి.. వచ్చే ఏడాది సంక్రాంతికి ఈ సినిమాని విడుదల చేయడానికి దర్శకనిర్మాతలు ప్లాన్ చేస్తున్నారు.

ఇక ఈ సినిమా తర్వాత ఎస్.ఎస్.రాజమౌళి దర్శకత్వంలో తెరకెక్కబోయే మల్టీస్టారర్ మూవీలో రామ్ చరణ్ నటించేందుకు సిద్ధమవుతుండగా.. బోయపాటి కూడా బాలకృష్ణ సినిమాతో బిజీ కానున్నారు.