నిన్న‌టి త‌రం అందాల న‌టి శ్రీదేవి గా ర‌కుల్ ప్రీత్‌సింగ్ తెర‌పై త‌ళుక్కుమ‌ని మెర‌వ‌నున్నారు. `య‌న్‌.టి.ఆర్‌` బ‌యోపిక్ కోసం ర‌కుల్ ఈ పాత్ర‌ను పోషిస్తున్నారు. అక్టోబ‌ర్ 10 ర‌కుల్ ఫ్రీత్‌సింగ్ పుట్టిన‌రోజు. ఈ సంద‌ర్భంగా `య‌న్‌.టి.ఆర్‌` సినిమా యూనిట్ ఆమె ఫ‌స్ట్ లుక్‌ను విడుద‌ల చేసింది.

ఈ ఫొటోలో ఆమె ఆకు చాటు పిందె త‌డిసె పాట‌లో శ్రీదేవి క‌నిపించిన‌ట్టు క‌నిపిస్తున్నారు. అంటే.. య‌న్.టి.ఆర్ బ‌యోపిక్ తొలి భాగం క‌థానాయ‌కుడులో ర‌కుల్, బాల‌య్య మీద ఆకు చాటు పిందె త‌డిసె పాట ఉండ‌బోతుంద‌న్న‌మాట‌. ర‌కుల్ లుక్‌కి మంచి స్పంద‌న వ‌స్తోంది.ఈ పాత్ర కోసం తాను చాలా క‌ష్ట‌ప‌డ్డాన‌ని, శ్రీదేవి న‌టించిన పాత సినిమాలు కూడా చూశాన‌ని ఇప్ప‌టికే ర‌కుల్ ప్రీత్ సింగ్ చెప్పారు.

య‌న్.టి.ఆర్ బ‌యోపిక్‌ను క‌థానాయ‌కుడు, మ‌హానాయ‌కుడు అని రెండు భాగాలుగా రూపొందించ‌నున్న విష‌యం తెలిసిందే. తొలి భాగాన్ని జ‌న‌వ‌రి 9న , రాజ‌కీయ రంగానికి సంబంధించిన మ‌హానాయ‌కుడు భాగాన్ని జ‌న‌వ‌రి 24న విడుద‌ల చేయ‌నున్నారు. య‌న్‌.టి.ఆర్ బ‌యోపిక్ గురించి తెలుస్తున్న ఆస‌క్తిక‌ర‌మైన అంశాలు అభిమానుల్లో పండుగ వాతావ‌ర‌ణాన్ని నింపుతున్నాయి.

ఈ సినిమాను ఎన్‌బీకే ఫిల్మ్స్ ఎల్ ఎల్ పీ సంస్థ‌పై నంద‌మూరి బాల‌కృష్ణ నిర్మిస్తున్నారు. వారాహి చ‌ల‌న‌చిత్రం, విబ్రి మీడియా సంస్థ‌లు స‌మ‌ర్పిస్తున్నాయి. సాయి కొర్ర‌పాటి, విష్ణు స‌హ నిర్మాత‌లు.