ఫిబ్రవరికి వాయిదాపడిన 'రాజుగాడు'?
- IndiaGlitz, [Tuesday,January 09 2018]
రాజ్ తరుణ్ హీరోగా సంజనా రెడ్డి రూపొందించిన చిత్రం రాజుగాడు'. ఇందులో అమైరా దస్తర్ కథానాయికగా నటించింది. సుంకర రామబ్రహ్మం నిర్మించిన ఈ చిత్రాన్ని సంక్రాంతి బరిలో దింపాలని ప్లాన్ చేసారు. అయితే.. అన్నపూర్ణ స్టూడియోస్ పతాకంపై రాజ్ తరుణ్ న‌టించిన రంగుల రాట్నం' సినిమా కూడా అదే స‌మ‌యంలో విడుదల కానుండడంతో.. ఈ సినిమాని ఫిబ్రవరికి వాయిదా వేసారు. శ్రీ రంజని దర్శకురాలిగా పరిచయం కానున్న రంగుల రాట్నం' సినిమాలో రాజ్ తరుణ్ ఒక మిడిల్ క్లాస్ అబ్బాయిలా కనిపించబోతున్నాడు.
ఇందులో గ్రీటింగ్ కార్డ్స్ తయారు చేసే కంపెనీలో పని చేస్తూ ఉంటాడని తెలిసింది. ఈ మూవీతో చిత్ర శుక్లా నాయికగా పరిచయం కాబోతోంది. ఆసక్తికరమైన విషయమేమిటంటే...రాజ్ తరుణ్ చేసిన ఈ రెండు చిత్రాలకి లేడీ డైరెక్టర్సే దర్శకత్వం వహించారు. గత సంక్రాంతికి పెద్ద సినిమాల మధ్య చిన్న సినిమాతో వచ్చి శర్వానంద్ విజయాన్ని అందుకున్నారు. మరి ఈ సంక్రాంతికి పెద్ద సినిమాల మధ్య వస్తున్న రంగుల రాట్నం'తో.. రాజ్ తరుణ్ ఎలాంటి సంచలనం సృష్టించబోతున్నాడో చూడాలి.