சிவகார்த்திகேயன் நடிக்கும் ’SK 21' என்ற படத்தின் படப்பிடிப்பு கடந்த சில நாட்களுக்கு முன்னர் காஷ்மீரில் தொடங்கிய நிலையில் திடீரென அம்மாநில அதிகாரிகள் படப்பிடிப்பை நிறுத்தியதால் படக்குழுவினர் சென்னை திரும்பினர் என்பதை பார்த்தோம். இந்த நிலையில் தற்போது மீண்டும் ராஜ்குமார் பெரியசாமி இந்த படத்தின் படப்பிடிப்பு குறித்த தகவலை தனது இன்ஸ்டாகிராம் பக்கத்தில் தெரிவித்துள்ளார்.

சிவகார்த்திகேயன் மற்றும் சாய் பல்லவி நடிப்பில் ராஜ்குமார் பெரியசாமி இயக்கத்தில் கமல்ஹாசனின் ராஜ்கமல் இன்டர்நேஷனல் நிறுவனத்தின் தயாரிப்பில் உருவாக இருக்கும் திரைப்படம் ’SK 21'.

இந்த படத்தின் படப்பிடிப்புக்காக கடந்த சில நாட்களுக்கு முன்னர் படக்குழுவினர் காஷ்மீர் சென்ற நிலையில் திடீரென அங்குள்ள அதிகாரிகள் படப்பிடிப்பை நிறுத்தினர். டெல்லியில் ஜி 20 மாநாடு நடக்க இருப்பதை அடுத்து பாதுகாப்பு காரணங்களுக்காக படப்பிடிப்புக்கு அனுமதி மறுக்கப்பட்டதாக கூறப்பட்டது.

இந்த நிலையில் தற்போது மீண்டும் படப்பிடிப்பு நடத்த அனுமதி கிடைத்துள்ளதை அடுத்து படக்குழுவினர் காஷ்மீர் சென்றுள்ளதாகவும் படப்பிடிப்பு தொடங்கி விட்டதாகவும் தகவல் வெளியாகியுள்ளன. இது குறித்து அறிவிப்பை ராஜ்குமார் பெரியசாமி தனது இன்ஸ்டாகிராம் பக்கத்தில் தெரிவித்துள்ளார். மேலும் நடிகர் சிவகார்த்திகேயன் இன்னும் ஒரு சில நாட்களில் காஷ்மீர் சென்று படப்பிடிப்பில் கலந்து கொள்வார் என்று எதிர்பார்க்கப்படுகிறது.

சிவகார்த்திகேயன், சாய் பல்லவி உள்ளிட்ட பலர் நடிக்கும் இந்த படத்திற்கு ஜிவி பிரகாஷ் இசையமைக்கிறார் என்பது குறிப்பிடத்தக்கது.