தனுஷ் நடிப்பில் வெற்றிமாறன் இயக்கத்தில் உருவாகியுள்ள ’அசுரன்’ திரைப்படம் வரும் அக்டோபர் 4ம் தேதி வெளியாக உள்ளது. இந்த படத்தில் பிரபல மலையாள நடிகை மஞ்சுவாரியர் நாயகியாக நடித்திருந்தார் என்பது தெரிந்ததே. இந்த நிலையில் தனுஷின் அடுத்த படத்திலும் ஒரு மலையாள நடிகை நாயகியாக நடிக்க உள்ளதாக செய்திகள் வெளிவந்துள்ளது

தனுஷ் தற்போது கார்த்திக் சுப்புராஜ் இயக்கி வரும் படத்தில் நடித்து வருகிறார். இந்த படத்தின் படப்பிடிப்பு லண்டனில் விறுவிறுப்பாக நடந்து வருகிறது. அதிரடி கேங்க்ஸ்டர் திரைப்படமான இந்த படத்தின் படப்பிடிப்பு ஒருபக்கம் நடந்து வரும் நிலையில் இன்னொரு பக்கம் தனுஷ், பரியேறும் பெருமாள் இயக்குனர் மாரி செல்வராஜ் படத்தில் நடிக்க உள்ளார். கலைப்புலி எஸ் தாணு தயாரிக்க உள்ள இந்த படத்தின் ஆரம்பகட்ட பணிகள் தொடங்கிவிட்டன

இந்த நிலையில் இந்த படத்தில் தனுஷ் ஜோடியாக பிரபல மலையாள நடிகை ரஜிஷா விஜயன் என்பவர் நடிக்கவிருப்பதாக செய்திகள் வெளிவந்துள்ளது. சமீபத்தில் மலையாளத்தில் வெளியான ’ஜூன்’ என்ற படத்தில் ரஜிஷா விஜயன் நடித்திருந்தார் என்பதும் இந்த படத்தால் அவர் கேரளா மட்டுமின்றி பக்கத்து மாநிலங்களிலும் புகழ் பெற்றிருந்தார் என்பதும் குறிப்பிடத்தக்கது. அதேபோல் கடந்த வாரம் இவர் நடித்த ‘பைனல்ஸ்’ என்ற திரைப்படமும் நல்ல வரவேற்பை பெற்றுள்ளது என்பது குறிப்பிடத்தக்கது