சூப்பர் ஸ்டார் ரஜினிகாந்த் நேற்று தூத்துகுடி சென்று துப்பாக்கி சூடு சம்பவத்தில் காயம் அடைந்தவர்களுக்கு ஆறுதல் கூறியதோடு பண உதவியும் செய்தார். பின்னர் அவர் செய்தியாளர்களுக்கு பேட்டியளித்தபோது 'ஸ்டெர்லைட் போராட்டத்தில் சமூக விரோதிகள் ஊடுருவியதால் கலவரம் ஏற்பட்டதாகவும், அந்த சமூக விரோதிகளை இனம்கண்டு அவர்கள் மீது கடுமையான நடவடிக்கை எடுக்க வேண்டும் என்று கூறினார்

மேலும் சென்னை திரும்பியவுடன் மீண்டும் செய்தியாளர்களை சந்தித்த ரஜினி, 'எதற்கெடுத்தாலும் போராட்டம் போராட்டம் என்று இருந்தால் தமிழகமே சுடுகாடாகிவிடும் என்றும் அவர் கோபமாக தெரிவித்தார்.

இந்த நிலையில் ரஜினியின் இந்த கருத்து குறித்து விமர்சனம் செய்த நடிகரும் அகில இந்திய சமத்துவ மக்கள் கட்சியின் தலைவருமான சரத்குமார், 'மக்கள் போராட்டத்தை கொச்சைப்படுத்தும் வகையில் பேசிய, நடிகர் ரஜினிகாந்த் மீது தேசத்துரோக வழக்குப்பதிவு செய்ய வேண்டும் என்றும் போராடும் குணம் இல்லாமால் ஒரு மனிதன் எப்படி வாழமுடியும் என்றும் கூறினார்.

மேலும் சமூக விரோதிகள் யார் என்பது தெரியும் என்று கூறிய ரஜினிகாந்த் உடனே அந்த பட்டியலை ஒரு நபர் ஆணையம் முன்பு ரஜினி கொடுக்க வேண்டும். இல்லையெனில் ரஜினியை தேசத்துரோக குற்றச்சாட்டில் கைதுசெய்ய வேண்டும் என்று சரத்குமார் கூறியுள்ளார்.